mittarfiit
Avannaata Kommuniata inatsisiliupallanneq maanna tapersersulerpaa
Avannaata Kommuniani borgmesterinngortussap maanna Naalakkersuisut nunanit allaneersut akileraannginnerusannginnissaannik siunnersuutaat tamakkiisumik tapersersulerpaa, taakku ilanngaatitaqanngitsumik 35 procentimik akileraartassapput, akileraarutiniillu isertitat ilanngarnagit nunap karsianut tutsinneqartassallutik.
- Naalakkersuisut inatsisissatut siunnersuuttaat taperserpara, iluaqutissat ajoqutissanit amerlanerujussuussammata.
Avannaata Kommuniani borgmesterinngortussaq, Palle Jerimiassen (S) tusagassiuutinut nalunaarummi allappoq.
Sapaatip-akunnerata aallartinnerani siunnersuummut taanna qularuteqaraluarpoq, Naalakkersuisut siunnersuut saqqummiummassuk kommunit tusarniarneqaqqaannginnerat pissutigalugu.
- Siunissaq isigalugu aaqqiiniarluni suliniutit tapersersornarput, tassami ukiorpassuarni Ilulissani mittarfiup tallinissaa utaqqinikuuarput, massakkullu aalajangernerup kiisami piviusunngortitsinissaq qanillitippaa. Aningaasarsiornikkut siuariartornissaq pissappat Ilulissani mittarfiup tallineqarnissaa saneqqunneqarsinnaanngilaq, Palle Jerimiassen erseqqissaavoq.
Atuaruk: Inatsisiliupallanneq kommuninit uggorineqarpoq
Inuussutissarsiornikkut aallartittoqassasoq
- Siunnersuut tamakkiisumik taperserpara, sanaartornerit annertuut mittarfiup tallinerata kingunerisaanik ingerlanneqalerpata nunaqavissut sanaartornermik suliaqartut suli amerlanerusut aamma pisariaqartilissavagut, niuertarfiit, taxat, allallu inuussutissarsiortut tamarmik ilorraap tungaanut malugisussaavaat, Palle Jerimiassen allappoq.
Inatsisissatut siunnersuummi atuarneqarsinnaavoq, nunanit allanit suliartortut akileraannginnerusassapput, ilanngaateqanngitsumik 35 procentimik akileraartassapput, akileraarutitigullu isertitat nunap karsianut tamakkiisumik tutsinneqartassapput, inatsit ataasinngormat siullermeerneqarpoq, intasillu aqagu marlunngornermi akuerineqarnissaa naatsorsuutigineqarpoq.