Avatangiisinik mingutsitsinersuaq ingerlaqqippoq
Mexicop Kangerliumarngani ajunaarnersuaq maanna USA-p oqaluttuarisaanerani uuliaarluernerup annersaatut pisortatigoortumik nalunaarutigineqarpoq - Barack Obamap itisuumi uuliamik qillerinerit tamaasa unitsippai.
Uuliasioqatigiiffiup BP-p tallimanngornerup unnuaani Den Mexicanske Golfimi uuliap aniaffia matuniarlugu ingerlateqqikkaa oqaatigineqarpoq nunap oqaluttuarisaanerani aatsaat taama annertutigisumik uuliaarluertoqartoq. Manna tikillugu uulia 70 aamma 112 millioner liiteri aniasimavoq. Taamaasilluni USA-mi manna tikillugu uuliaarluernerit annersaannit annertunerujussuuvoq, tassa 1989-imi umiarsuaq uuliamik assartuut Exxon Valdez Alaskap sineriaani sunnertiasumi uuliamik 42 millioner liiterimik maangaannartitsimmat.
Top kill-missionimik taaneqartoq, tassa BP-p uuliap aniaffianik marallummik oqimaatsumik matusiniarnera ingerlaqqippoq, selskabi sisamanngormat nalunaaraluartoq uuliap anianera unitsinneqarsimasoq.
USA-p præsidentiata Barack Obamap, ullumi tallimanngornermi naalgaaffimmi Louisiana-mi uuliamik mingutsitsinermik takuniaasup Mexicop Kangerliumarngani uuliap anianeranik naalakkersuisut iliuuseqarniarnerat illersorpaa.
- Ajunaarnersuaq tamanna isinik ammaatitsisariaqarpoq, tusagassiortunik katersortitsinermini oqarpoq.
Tamatuma saniatigut Obamap oqaadtigaa qaammatini tulliuttuni arfinilinni imaani itisuumi uuliamik qillerinissamut akuersissuteqartoqassanngitsoq. Aamma akuersissutit isumaqatigiissutillu pioreersut arlallit, uuliasioqatigiinnut tunniunneqareersimasut, atorunnaarsippai. Aamma uuliasioqatigiiffiup Shell-ip aasaru Alaskami qillerinissamik pilersaarutaa atorunnaarsippaa.
- Matumani pisumi uuliasioqatigiiffissuit naalakkersuisut suliffeqarfiinut qasukkarsimasumik ilaannikkullu peqquserluttumik inissisimasarnerat pingaaruteqanngitsorujussuuvoq, præsidenti erseqqissaavoq, nassuerutigaali uuliasioqatigiiffiit uuliamik aniatitsinermi iliuuseqarsinnaassusiat upperivallaarsimallugu.
Naatsorsuinerit nutaat takutippaat Louisianap sineriaata avataani uuliasiorfimmit qaartoortumit uulia 12.000-19.000 liiteri ulloq unnuarlu aniasartoq. BP-p manna tikillugu naatsorsuutigisimavaa 5000 liiteriinnaq aniasartoq.
Obamap BP uuliasioqatigiiffiillu allat sakkortuumik saassukkaluarlugit præsidentip erseqqissarpaa uulia nunami nukissaqarfiit suli pingaarnersarigaat.
- Uulia suli nukissaqarniarnitsinni pingaarnerusutut ilaasariaqarpoq. Nukissamik mingutsitsinngitsumik atuilernissatsinnut teknikkikkut atortoqalernissatsinnut suli ukiut arlallit ingerlaqqaassapput, aviisi New York Times malillugu oqarpoq.
Uula gas-ilu Mexicop Kangerliumarnganeersoq ullumikkut amerikarmiut nukissamik tunisassiornerisa 30 procenteraa.