B-52-ip nakkarfiata eqqaani uumasut iloqiaat
Puisit meqqoqanngitsut umimmaallu iloqiaasunik kukiffallit Pituffiup eqqaani takornartaanngillat, 1968-imi Amerikamiut timmisartuata qaartartumeerutip B-52-ip nakkarnerata kingorna.
Aasaq DIIS-imi misissuinerup takutippaa, sikup ataani atominik qaartartut amiakkoqanngitsut. Taamaattorli sumiiffimmi uumasut sumit arlaannit sunnerneqartarput, knr.gl allappoq.
Piniartoq Inatsisartunullu ilaasortaasimasoq, Siumut, Uusaqqak Qujaukitsoq, misissuiffeqalernissaanut aningaasanik kissaateqarpoq, susoqarnersoq misissorneqarsinnaaniassammat.
Uusaqqak Qujaukitsup ersissutigaa, sumiiffimmi uumasut iloqissiortarnerannut qinngornernik ulorianartunik suli amiakkoqarsinnaanera.
– Misissuiffeqanngilarli paasisallu ingerlateqqinneqarsinnaanatik, radioaviisimut oqarpoq.
Dansk Institut for Internationale Studier 1968-mi nakkarnerup kingorna sulinermi aqutsisuuvoq. Naliliineq erseqqippoq: Kalaallit Nunaanni atomit nukinganik qaartartunik amiakkoqanngilaq. Amerikamiut qaartartup sinneri tamaasa angerlaappaat, sinneruttorlu pujoralanngorluni sikumut siaruarneqarpoq.