Qaqortoq
Bankimut tillinniaq: Angut imminut politiinut tunniuppoq
Qaqortumi Grønlandsbankenimut aamma Kommune Kujallermut tilliniariaraluartoq politiinut pingasunngornermi imminut tunniussimavoq. Ujaasinermi nalunaarummi imminut ilisarisimavoq
Qaqortumi Grønlandsbankeni aamma Kommune Kujalleq marlunngornerup unnuaani iserfigineqarput.
Politiit marlunngornermi siorasaarutigaat tilliniariaraluartup assigi bankip filmiliutaanit immiunneqarsimasut saqqummiunneqassasut, angut nammineerluni politiinut imminut nalunaarutiginngippat imaluunniit politiit allatut iliorlutik kinaassusersinngippassuk.
Politiillu Grønlandsbankenimit immiussani angutip bankimut isernera avammut saqqummiunniarlugu siorasaarinerat kinguneqarluarsimagunarpoq.
Kujataanimi politiini politikommissæriugallartoq Sîvalêrak' Terkilsen pingasunngornermi ilisimatitsivoq angut imminut politiinut tunniussimasoq.
Atuaruk: Grønlandsbankenimut tillinniaq - politiit takunnissimasunik ujartuipput
Angut imminut ilisarivoq
Politiit marlunngornermi angummik ujaasillutik qanoq isikkoqarneranik nalunaaruteqarput Grønlandsbankenimi immiussat aallaavigalugit.
Sîvalêrak' Terkilsenilu Sermitsiaq.AG-mut oqaluttuarpoq angut politiinut imminut tunniussimasoq, politiit Grønlandsbankenimut Kommune Kujallermullu tillinniariaraluartumut nassuiaataannut imminut ilisarisinnaasorigami.
- Kisianni taamaaliornini eqqaamasinnaanngilaa, oqarpormi aalakoorsimalluni, Sîvalêrak' Terkilsen oqaluttuarpoq.
Angut pingasunngornermi apersorneqareerluni tillinniariaraluarsimasutullu unnerluutigisareerluni iperagaavoq.
- Kisianni eqqartuussivikkut malersorneqarnissani naatsorsuutigisinnaavaa, Sîvalêrak' Terkilsen oqarpoq.