Toqusoq
Betina eqqissivoq
Kræftimik napparsimasoq Betina Kristiansen pingasunngornermi ualikkut eqqissivoq
Betina Kristiansen 2011-miilli iviagimmigut kræfteqarnerminut akiuuttoq pingasunngornermi ualikkut Bispebjergip napparsimmaviani toquvoq. Facebook aqqutigalugu tapersersuisut ’Vi vil have Betina rask igen’ taama nalunaarput.
Betina Kristiansen tunniutiinnarumasimanngilaq pisortat peqqinnissaqarfiat nalunaarmat ikioqqissinnaanagu kræfti puaanut tinguanullu siaruaammat. Ilaquttani peqatigalugit Tysklandimi Frankfurtimi Universitets Hospital attavigaat taakku toqqaannarnerusumik kemo atorlugu nakorsaasinnaammata.
Facebook aqqutigalugu tapersersuisut ’Vi vil have Betina rask igen’ aningaasanik katersuiniarnermik aallartitsipput Tysklandimi nakorsarneqarnissaa 400.000 – 500.000 koruunit missaannik akeqarsinnaasoq pisortat akilersinnaanngimmasuk.
Betina Kristiansenili pingasunngornermi perulunninngorpoq Bispebjerg Hospitalimilu eqqissilluni.
Aningaasat katersorneqartut sinneri nappaassuarmit kræftimit eqqugaasut ilaqutaat ikiorniarlugit aningaasaateqarfimmut Ikualamut tunniunneqassapput.
Facebook aqqutigalugu ikiuiniartut ’Vi vil have Betina rask igen’ kajumissaaripput pingasunngornermi unnukkut igalaat saanni naneruummik inuit ikitseqqullugit Betina Kristiansen eqqaaniarlugu.