Borgmesteri: Meeqqat silap pissusianut tunngatillugu oqariartuutaannut tusarnaarta
Silap pissusiata allanngoriartorneranut ilisimasat naammatsillugit inuiaqatigiit iliuuseqartariaqarnerannik meeqqat oqariartuutaannut tusarnaarnissamut, Avannaata Kommuniani borgmesteri kaammattuivoq. Meeqqat siunnersuutigisaasa ilaannik kommuni suliniuteqareerpoq.
- Silaannaap allanngoriartornera pillugu qanoq iliuuseqannginnissatsinnut ilisimasaqarpallaarpugut. Ataatsimoorluta iliuuseqartariaqarpugut, taama meeqqat oqariartuuteqarput.
Nakuusami oqariartuutit ilaat taamaappoq, taakku sisamanngornermi 18. januaarimi oqariartuutitik politikerinut saqqummiuppaat.
Avannaata Kommuniani borgmesteri, attaviitsoq Palle Jerimiassen, maanna qisuariarpoq, taanna meeqqat kissaataannut siunnersuutaannullu tusarnaartoqarnissaanik kajumissaaruteqarpoq.
- Inuusuttut naalaarnissaat pingaartuuvoq, suliaallu ajasoorutigaakka. Qinikkat akornanni isumaqatigiissutaavoq, Avannaata Kommuniani suliassaqarfiit, inuusuttunit aamma tikkuarneqartut, ukkatarineqarnerulernissaat, borgmesteri Palle Jerimiassen taama oqarpoq.
Allat biilinit mingutsitsinnginnerusut
Nakuusap politikerinut oqariartuutigisaasa ilagaa, bussit innaallagissamik ingerlateqartut ukkatarineqarnerusariaqarnerat aamma biilit orsussamik ikummateqartunut taarsiullugu sikkilertarnissaq, aqqusinermi mingutitsineq taamaalilluni annikillisarneqassaaq.
Ataavartumik najukkami nunalu tamakkerlugu nukissiornerup atorneqarnerulernissaanut pilersaaruteqartoqarnersoq, inuusuttuttaaq oqariartuuteqarnerminni apeqqutigaat.
- Avannaata Kommuniata anguniagaani allassimavoq Ilulissat ukioq 2030-imi CO2 pillugu oqimaaqatigiissumik atuiffiulersimassasoq, qinikkallu eqqumaffigilluinnarpaat, piujuaannartitsineq tunngavigalugu ineriartortitsissallutik. Pingaartuuvoq tamatta iliuuseqaqataanissarput, borgmesteri Palle Jerimiassen oqarpoq.
Eqqakkanik immikkoortiterineq
Inuusuttut Avannaata Kommunianeersut ataatsimeersuarnermut peqataasut eqqakkanik immikkoortiterisoqarnerunissaanik kissaateqarnerarput.
Eqqakkat ikuallanneqartussat nukissamik pilersitsisariaqarput, taanna kiassarnermut atorneqartassaaq. Eqqakkanik immikkoortiterisarnissaq, 2023-imi Avannaata Kommuniani ukkatarineqarniarpoq. Ilulissani sumiffinni arlalinni eqqaavissuit igalaaminernut saviminernullu atugassiat inaalinneqarput. 2023-imi aama annertunerusumik ukkatarineqarniarpoq eqqakkat immikkoortiterneqartarnissaat kiisalu eqqakkanik navianartunik tunniussisalernissaq.
Aalajangersagaq Nakuusap decembarimi 2022-mi ataatsimeersuarneranit inuusuttunit suliarineqarpoq.