Borgmesterinngortoq: Pissaanermik paarisaqarnissaq pingaartitarinngilara

32-nik ukioqarpoq erneqarlunilu. Nunatsinni kommunit annersaanni borgmesterinngoqqammerpoq, tassani atuuffeqarnermi ullut suliffiusut sivisusinnaallutik. Piffissami pissaanermik atornerluisoqarneranik pasilliisoqarneranik, politikkikkut isumaqatigiinngiffiusumi borgmesterinngorluni.

Tamanna Charlotte Ludvigsenimit eqqissisimasumik tiguneqarpoq. Borgmesterinngornissanimi kissaatigiuaannarsimavaa.

- Tulliani qinersereernermi imaluunniit qinersereernerup aappaani aatsaat borgmesterinngornissara siunniunnikuugaluarpara, ullumi ataatsimi borgmesterioreersoq oqarpoq. Taassuma unnuaq sininnaveersimalluni oqaatigaa - ippassarmi marlunngormat borgmesterisut ivertinneqarpoq.

Aalajangiinerit pingaarutillit

Aalajangiinernut pingaarutilinnut piareersimallunilu sunniuteqarnissani piareersimaffigalugu oqarpoq. Nuummi peroriartornikuuvoq, atuarfimmi sinniisaanikuulluni klubbinilu aamma suliaqartarnikuulluni. Utoqqaat atugassaqartilluarneqarnissaat pingaartitaraa, utoqqarmik ilaatigut pulaartagaqartarnikuulluni.

Sunniuteqarluarusuttuuvoq, inuppalaartuulluni qungujulasoq.

Ukiuni aqqaneq marlunni politikkikkut suliaqarneq

- Angusaqarusuttuuvunga. Oqaluinnarluni iliuuseqarniarsarineq soqutigisarinngilluinnarpara, Rigsombuddimi ukiuni kingullerni sisamani atorfeqarsimasoq Charlotte Ludvigsen oqarpoq.

Inuunermini Nuummi kisimi najugaqarnikuuvoq, nunat tamalaat aningaasarsiornerat pillugit ilinniagaqarnikuullunilu personalejura ilinniagarinikuullugu. Inuit Ataqatigiinni aamma ukiuni arlalinni suleqataanikuuvoq, kiisalu Asii Chemnitz Narupip borgmesteriunerani aamma allattaanikuulluni.

Politikkikkut assorilimaarfik

Politikkikkut piffissami aggersumi suli aalassassimaartoqarnissa naatsorsuutigaa.

- Taamaattoq Asii politikkikkut tunngaviliilluarnikuuvoq. Tamanna tunngavigalugu issiavimmut inginnissaq kiisalu akisussaaffimmik tigusinissaq ajornaannerussaaq, Charlotte Ludvigsen nassuiaavoq.

Politikkikkulli isumaqatigiinngiffiit, soorlu Demokraatinik suleqateqareernerup kingorna naaperiaanissat - suliassaanut tullinnguupput.

- Ajornaatsuinnaassanngitsoq ilisimavara, taamaattoq upperaara Siumut aamma Demokraatit suleqatigilluarneqarsinnaasut. Suleqatiginissaannut piareersimavunga, Charlotte Ludvigsen naqissusiivoq. Tasiilaq pillugu piviusulersaarutip takutinneqareernerata kingorna Demokraatit oqariartuutigisimasaat borgmesterinngorlaamit uggorineqarpoq.

Akerleriinnerit

- Meeqqat inuusuttullu atugaat pitsaanerulersinniarlugit Siumut aamma Demokraatit sulissuteqartuusut qularinngilara - Tasiilamiinnaanngitsoq, kommunimili tamarmiusumi. Tamanna suleqatigiissutigilluarsinnaavarput. Meeqqat politikkikkut assorilisimaarfimmi eqqorneqassanngillat, oqarpoq.

- Iliuuseqartoqarnissaa aamma angusaqartoqarnissaa sulissutigiuaannarnikuuara. Politikkikkut akerleriittoqarnissaa kissaatiginikuunngisaannarpara, taamaattumik iliuuseqaqatigiittariaqarpugut, kommunalbestyrelsimi ataatsimut akisussaaffeqaqatigiippugut, Charlotte Ludvigsen oqarpoq.

Sukataarnissaq

Politikkikkut angusaqarniaraarni sukataartoqartariaqartoq oqaatigaa.

- Politikkikkut akerleriinneq qaangiuttuaannarpoq, suliassanut pingaarutilinnut kommunip ineriartornissaa anguniarlugu suleqatigiilluta angusaqaqatigiissinnaavugut, oqarpoq. Asii ikiortigilluarsimallugu oqaatigaa, taamaasilluni maanna akisussaaffimik tigusisinnaanngorluni piareersimasutut misigaluni.

Suliassat pingaarnerit tallimat

Kommunalbestyrelsimut qinersisoqaqqinnissaata tungaanut politikkikkut iliuuseqarfigineqartariaqartut tallimat taakkartorpai:

• Meeqqat inuusuttullu kommunimi tamarmiusumi
• Inuussutissarsiorneq. Ineriartorneq, kiisalu mittarfiup tallineranut periarfissat atorluarnissaat
• Ineqarniarnerup pitsaanerulernissaa, kiisalu illoqarfiup ineriartortinneqaqqinnissaanut piareersarnerit. Angerlarsimaffeqanngitsut atugarisaannut tunngatillugit ajornartorsiutit aningorneqarnissaat neriuutigaa
• Nunaqarfinni illoqarfinnilu utoqqaat atugaat pitsaanerulernissaat
• Timersorneq kulturilu pitsaaliuinermut aqqutaassapput
  

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...