Brugsen nersornaaserneqartoq
Innarluutillit kattuffiata diplomi ataasinngormat KNB-mut - Kalaallit Nunaanni Brugsenit - tunniuppaa, innarluutilinnut brugsenimiit brugsenimullu isertarnerit ajunnannginnerulersissimammagit.
Innarluutillit peqatigiiffiisa pisiniarfinnut, pisortat allaffiinut suliffeqarfinnullu isertarfiit innarluutilinnut ajornannginnerusunngortinneqarnissaat ukiorpasuarni kissaatigiuarsimavaat.
Kiisami nuannaarutissinneqarpugut, tamallu Nuummi ataasinngormat nalliuttorsiualaartitsinermi nalliusineqarpoq.
Innarluutillit Kattuffiata siulittaasuata Mette-Sofie Lerchip Nuummilu immikkoortortaqarfimmi siulittaasup Else Lea Olsenip diplomi naasullu brugsenip ittuaraanut Olav Thomsenimut siulittaasumullu Arne Lundimut tunniuppaat, pisiniarfinnut innarluutilinnut pitsaasunut qujassuteqarlutik.
- Brugsenit pisiiarfinni ataasiakkaani innarluutillit iserniartarnerannut taamak annertutigisumik iliuuseqarsimanerat assorsuaq iluarisimaarparput, pisiniarfinni angisoorsuaannaanngitsoq, aammalu pisiniarfinni mikinerusuni, Mette-Sofie Lerch oqarpoq.
Innaarluutillit Kattuffiat aatsaavisuaq niuertarfimmut nersornaasiivoq.
- Siunissami aamma pisariaqaraangat taamaaliortarniarpugut, Mette -Sofie Lerch oqarpoq.
Kalaallit Nunaanni Brugsenit siulittaasuata Arne Lundip innarluutillit peqatigiiffiisa kattuffiannit diplomitaartik assut tulluusimaarutigaa.
- Assorsuaq tulluusimaarpugut innarluutilinnullu pissutsit pitsaanerulersinniarlugit suliniutigisimasatsinnut nersualaarinninnertut tiguagut, Arne Lund oqarpoq.
Taassuma suliffeqarfiit allat, pingaartumik pisortat suliffeeqarfiit, Brugsenip iliuusaa maleqqullugu kajumissaarpai.
- Sumiiffiit innarluutilinnut naleqquttunngorsarlugit nutartertariaqartut amerlaqaat, Arne Lund oqarpoq.
KNB aappaagu Sisimiuni Brugsenimi elevatoriliiniarpoq.
- Taamaalilluta niuertarfigut angisuut tamarmik innarluutilinnut naleqqussarsimalissapput, Arne Lund oqarpoq.