Coronamut killilersuut kingulleq atorunnaarsinneqarpoq
Naalakkersuisut aalajangerput nunatsinnut tikinnermi killilersuutit atuuttut pingasunngornermi 18. maj atorunnaarsinneqassasut. Nunatsinnut tikittut akiuussusersimanermik uppernarsaammik peqartariaarupput.
Nunatsinnut tikittut Coronavirusimut akiuussusersimanermik uppernarsaateqartariaarupput.
Nunatsinnut tikinnermi killilersuutit atuuttut atorunnaarsinneqarnissaat Naalakkersuisut aalajangiuppaat, taamaasillunilu Kalaallit Nunaanut tikinnermi misissortissimanissamik akiuussuserneqarsimanissamillu uppernarsaateqarani 18. maj 2022-mit tikittoqarsinnaalerluni.
Namminersorlutik Oqartussat marlunngornermi unnukkut tusagassiorfinnut taama nalunaaruteqarput.
- Killilersuutit atorunnaarsinneqarnerini peqqinnissakkut ilisimasallit naliliineri aallaavigineqarsimapput, Peqqissutsimut Naalakkersuisoq Mimi Karlsen (IA) taama oqarpoq.
Pissutsilli ilungersunarsissappata tamanna allanngoqqissinnaasoq, naalakkersuisup erseqqissarpaa.
- Erseqqissaatigissavara naak nunatsinnut tikinnermi killilersuutit atuuttut atorunnaarsinneqarnissaat aalajangiunneqaraluartoq Covid-19-imut atatillugu pissutsit allanngoratarsinnaammata tamatumalu kingunerisaanik killilersuutit eqqunneqaqqissinnaammata. Pissutsit qanoq inneri qanimut ataavartumillu malinnaaffigeqqissaarpagut, Mimi Karlsen oqarpoq.
Atorunnaarsitsineq siuartinneqartoq
Nunatsinnut tikinnermi killilersuutit atuunnerini nunatsinni najugaqanngitsut tikinniartulli akiuussusersimanermik uppernarsaateqaqqaartussaatitaapput. Nunatsinnili najugaqanngikkaluarluni maanna tikittoqarsinnaalerpoq, aamma coronapas takutinnagu.
Nunatsinnut tikinnermi killilersuutit aprilip aallartinnerani sivitsorneqarput juunip aappaanut killilerneqarallarlutik. Killilersuutit atorunnaarsinneri Naalakkersuisunit taamaasillutik siuartinneqarput.