Covid-19: Tusagassiortunik ataasinngornermi katersortitsisoqassaaq
Naalakkersuisut Covid-19 pillugu killiffik ataasinngornermi nal. 10.00 tusagassiortunik katersortitsissaaq.
Oqartussat nun.gl aqqutigalugu kisitsisinik nutarterereersullu Naalakkersuisut siulittaasuat tusassiortunik katersortitsiniarluni ataasinngornermi nal. 10.00 qaaqqusivoq.
Kisitsisit sapaami nutarterneqarput, tassanilu ilaatigut arfinillit aamma covid-19-imik tunillatsissimasut atuarneqarsinnaavoq. Oqartussaniit paasissutissanik pissarsisoqarsinnaasimanngilaq.
Qaqortumi tunillatsittoq ataaseq paasineqareersorlu Nunatsinni sumiiffinni assigiinngitsuni tuniluuttoqalerpoq.
Katerinnissamut maleruaqqusat sisamanngornermi tusagassiortunik katersortitsisoqarnerani atuutsinneqarlerput. Inuit ornittagaanni taamaallaat 20-t katerissinnaapput, qanermullu assiaqut angalanermi pisiniarnermilu atoqquneqalerluni. Qaqortumiit Sisimiuniillu ataasinngorneq ilanngullugu aallartoqarsinnaajunnaarnissaa Naalakkersuisut sisamanngormat aamma aalajangiuppaat.
Kujataani tallimanngornerup ullaavani sisamanik tunillatsittoqarsimasoq paasineqarpoq, unnukkullu pingasut allat aamma tunillatsissimasut paasineqarluni. Sapaamilu arfinillit aamma tunillatsissimasut paasineqarpoq, taakkuli pillugit oqartussat suli annertunerusumik paasissutissiinngillat.
Kommune Kujallermi 12-it tunillatsissimapput, Kommuneqarfik Sermersuumi 7-it, Qeqqata Kommuniani 6-it Avannaata Kommunianilu ataaseq.
Kisitsisit uani takukkit.