isumaginninneq
D: Inuttassarsiuisannginnerit akuersaarneqarsinnaanngillat
Qaasuitsup Kommuniani isumaginnittoqarfimmi atorfippassuit inuttassarsiorneqarsimanngillat. Maanna kommunalbestyrelsimut ilaasortat sumiginnaasimasut, Demokraatit isumaqarput.
Sanigutit nutaat sanillaqqinnerupput, Qaasuitsup Kommuniani Demokraatit isumaqarput.
Isumaginninnermullu tunngatillugu sanerluartoqartariaqartoq partii isumaqarpoq.
Isumaginnittoqarfimmi atorfiit 55-t inuttaqanngitsut, AG-mit oqaluttuarineqarpoq. Atorfiit qaammatini arfinilissuarni allagarsiissutigineqannginnerat tamatuma nassuiaatissartaasa ilagaat.
- Tamanna akuersaarneqarsinnaanngilluinnarpoq aammalu illersorneqarsinnanngilaq, Demokraatinit kommunalbestyrelsimut qinigassanngortittoq, Elisabeth Mathæussen Sermitsiaq.AG-mut oqarpoq.
Isumaginninnermut ingerlatsisoqarfiup atorfiit allagartaliissutigineqartarnissaat qinnuigineqartarsimapput, kisianni immikkoortortaqarfimmi suliarinnittumi unitsinneqartarsimapput.
Isumaginnittoqarfimmi pisortap Henrik Soloyip kommunip avinneqarnissaa pillugu ulapinnermik tamanna pissuteqartoq AG-mut nassuiaavoq.
Aamma atuaruk: Isumaginnittoqarfimmi pissutsit najussimanartut - atorfinnik inuttassarsiuvinerit unitsinneqartut
- Politikerit issiasuusut ingammik Siumeersut aamma IA-meersut ukiuni sisamani sinissimapput Elisabeth Mathæussen oqarpoq, Qaasuitsup Kommuniani isumaginninneq pillugu isornartorsiunermi suliaq kingulleq siulliunngitsoq oqaatigaa.
Isumaginninnermut ataatsimiititaliami siulittaasup Kristian Jeremiassenip (S) ilaatigut suleqatini ataatsimiinnerni peqataasannginnerarlugit isornartorsiornikuuai.
- Isumaginninnermut tunngatillugu suliat pingaartorujussuupput. Suliat iluarsiivigineqarnissaat sulissutiginiarparput, Qaasuitsup Kommuniani avannarlermi qinigassanngortittoq oqarpoq.
Atorfiit sooq allagartaliunneqartarsimannginneri Demokraatit sukkasuumik misissorneqarnissaat kissaatigaat.
Inuttassarsiortannginnerit pillugit AG-mi atuakkit: