Ilinniarneq
Danmarkimi ilinniartut taamaatiinnartarnerat IA-p akiorniarpaa
Danmarkip ilinniartitaanermut ministeriata ataatsimeeqaatigineranut atatillugu folketingimut ilaasortaq Aaja Chemnitz Larsen (IA) siunnersuuteqarpoq, ilisimatusarnermut tunngasumik qallunaatut pikkorissartitsinernut aningaasaliisoqassasoq
Kalaallit amerlavallaartut Danmarkimi ilinniarnerminnik tamaatitsisarput.
Folketingimi ilaasortap Aaja Chemnitz Larsenip (IA) aamma danskit ilinniartitaanermut ministeriat Esben Lunde Larsenip (V) ataatsimeeqatigiinneranni, IA-mi politikerip Avalammit aammalu kalallit ilinniartut siunnersortaasa akornanni isumasioqatigiissimanerannit ernumatigineqartutut eqqartorneqarsimasut saqqummiuppai.
Atuaruk: Danmarki Nunarpullu ilinniartitaanermi ilisimatusarnermilu suleqatigiissapput
Amerlanerusut naammassisalissapput
Danmarkimi ilinniartitaanerup iluani aaqqissuusseqqinniarnermi kalaallit ilinniagaqartut eqqornerlunneqaratarsinnaanerat politikerit utaqqiinnassanngikkat, Aaja Chemnitz Larsen isumaqarpoq.
- Iliuuseqajaarnikkut sapinngisamik kalaallit ilinniartut amerlanerpaartaasa Danmarkimi ilinnigaqarnermik naammassisaqartarnissaat qulakkeerniagassarivarput.
Danmarkimi nunasilluni ilinniagaqalerneq ilinnialersussat piareersarluareersimanissaanik piumasaqartarpoq, assami angerlarsimaffik sungiusimasaq qimallugu nunamut allarluinnarmut ungaseqisumullu ilinniartitaanikkullu allatorluinnaq aaqqissuussifiusumut nuuttariaqarnermik nassataqartarmat, Aaja Chemnitz Larsen ministerimik ataatsimeeqateqarnermini erseqqissaavoq.
Ministerimut siunnersuut
Ilinniagartuutut danskit oqaasiinik atuisinnaalernissaq siunertaralugu imaluunniit ilinniagaqartut immikkut siunnersorteqartilernissaannut aningaasanik immikkoortitsisoqartariaqartoq taamaammat ministerimut ilaatigut siunnersuutigaa, ilanngullugu Naalakkersuisut aasaq 2016 aallarnerfigalugu suleqatigiissutigalugu piareersaataasumik aasaanerani ilinniarfimmik pilersitsisinnaanersut isumaliutigeqquaa.
Nunatsinnit Folketingimi ilaasortaatitap ullumi danskit Ilinniartitaanermut Ilisimatusarnermullu ministeriannik Esben Lunde Larsen-imik ataatsimeeqateqarnerani aamma eqqaamaqquneqarpoq, kalaallit ilinniartut amerlanerit Danmarkimi naammassisaqartarnissaat anguniarumallugu Nunatsinni oqartussat suleqatigalugit Danmarkimi kalaallit ilinniagaqartut atugaasa pitsanngorsaavigineqarnissaat danskit namminneq Naalakkersuisoqatigiilernissamik isumaqatigiissusiorneranni aamma ilaatinneqarmat.
Atuaruk: Avalak nutaanik siulersuisortaarpoq
Naapeqqissasut
Ataatsimiinneq upernaamut malitseqartinneqarluni nangeqqinneqassasoq ministerimit ilimasaarutigineqarpoq.
- Danmarkimi ilinniagaqartut atugaat pillugit nutaamik aaqqissuusseqqinniarnermi iliuuserineqartussat siunissami ilinniagaqartunut Kalaallit Nunaanneersunut kinguneqarnerlussinnaaneri ministerilu peqatigiilluta ammasumik oqaloqatigiissutigisinnaagatsigit nuannaarutigivara. Amerlasuummi aaqqissuusseqqinnerup sunniuteqarnerlussinnaanera ernumagivaat. Taamaammat isumaga malillugu tassani siusinaartumik pinaveersaartitsinissaq eqqarsaatigalugu pimoorussilluni ministeri iliuuseqarniartussaavoq, Aaja Chemnitz Larsen oqarpoq.