saarullittassat
Demokraatit Naalakkersuisut isumaqatigiissummik unioqqutitsinerarpaat
Naalakkersuisut aalisarnermut piniarnermullu isumaqatigiissut marloriarlugu unioqqutissimagaat, Michael Rosing isumaqarpoq
Oktobarimi taamani naalakkersuisoqatigiiusut saarullittassiissutissat pillugit isumaqatigiissuteqarput.
Tassani saqqumilaanngitsumik politikkikkut isumaqatigiinneq pineqarpoq, Demokraatit saarullittassiissutinut akuersaartinneqarput. Illuanik qalerallit aamma appat qulakkeerneqarnissaannik neriorsuiffigineqarput. Tamatuma saniatigut saarullittassat qaleralittassalluunniit amerlinneqaqqissanngillat.
Atuaruk: Saarullittassiissutit siunnersuutigineqartunit pingasoriaammik amerlanerupput
Saarullittassat qaleralittassallu amerlineqartut
Ataasinngormat saarullittassiissutit amerlineqarnerisa kingorna Demokraatit salloqittarneqartutut misigipput.
- Massakkulli piffissap sivikitsuinnaap ingerlareernerani isumaqatigiissut marloriarluni unioqqutinneqarpoq. Siullermik qaleralittassiissutit assagiarsuttaliissutillu amerlineqarput massakkullu saarullitassiissutit amerleqqinneqarput, Demokraatit aalisarnermut oqaaseqartartuat, Michael Rosing oqarpoq.
Sinerissap qanittuanin uungaannaq isigaluni pitsaanngitsumik aqutsinerusoq, taanna isumaqarpoq.
Atuaruk: Saarullitassat amerlineqarnerat akeqarsimavoq
Isumaqatigiissummik unioqqutitsisutut oqaatigineqartut
Naalakkersuisut taassuma isaanik neriorsuutinik unioqqutitsinerat asuliinnaanngilaq.
- Sunniutaali ajornerpaaq tassaavoq Naalakkersuisut politikkikkut isumaqatigiissutinik malinnissinnaannginnerat, Michael Rosing (D) oqarpoq, ulluni kingullerni oqallinnermut erseqqinngitsumik tunngatillugu nangippoq:
- Piffissami matumani naalagaaffinngornissap kiisalu nunanut allanut nammineq isumaqatigiissuteqartarnissatta oqallisigineqarnerani pingaaruteqarpoq takutissallugu isumaqatigiissutigisatta eqqortittarnissaat.
- Kisianni Naalakkersuisut isumaqarunarput ullormiit ullormut allanngorartitsisarneq salliussariaqartoq, Michael Rosing (D) kamalluni taama oqaaseqarpoq.
Naalakkersuisut siulittaasuannik, Kim Kielsenimik (S), Sermitsiaq.AG oqaaseqartitsiniarluni sulissuteqarpoq.