DMI: Suli ukiaagallassaaq
Nunap ilaani nittaallertalereeraluartoq, suli tuttunniarnissamut asiarnissamullu periarfissaqarluarpoq. Sapaatip akunnerata tulliani silap qanoq innissaanik ilimasaarut taama nalunaarpoq.
Avannaani pingasunngornermi 7. september nittaallerpoq.
Qaanaamiit, Upernavimmiit, Uummannamiit, Ilulissaniit Aasianniillu assit aputeqalersimanermit takutitsisut inuit nittartakkatigut attaveqaqatigiiffiini takuneqarsinnaapput.
Apulli aassasoq ilimagineqarsinnaavoq, ullummi tulliuttut siallernerullunilu anorlissangatinneqartoq, DMI-p nunatsinni immikkoortortaqarfianiit ilimasaarutigineqarpoq.
- Avannaani nittaallunilu masannartuliorsimanera naqitsiniisaffiup sakkortuup nillertullu Baffinbugtip nalaaniissimaneranik pissuteqarpoq. Sialussaraluit nittaalannguussimapput, silasiortoq Andy Lehtonen Sermitsiaq.AG-mut ilisimatitsivoq.
Ukioq utaqqigallarpoq
Avannaanili apiaarnera ukiujaarnissaanik ilimasaarutaasariaqanngilaq.
Silap qanoq innissaanik ilimasaarutip takutippaa sapaatip akunnerata tulliani siallernerullunilu anorlernerussasoq. Tamanna nuna tamakkiusarlugu atuuppoq.
- Naqitsiniisaffik sakkukinnerulersimavoq, kangiatalu tungaanut aallarsimalluni. Sila atoruminarnerulersinnaavoq, sialualaarluni, sumiiffiilli ilaanni anorlertassalluni, silasiortoq oqarpoq.
Aasaq qaangiukkiartulerpoq
- Silap qanoq innissaanik ilimasaarummi takusinnaanngilara ukiujaarnissaa. Kisianni nillertikkiartuaarpugut, ukiullu qanoq ilinera malillugu tamanna pissusissamisoorpoq. Aasaq qaangiukkiartulerpoq, Andy Lehtonen oqarpoq.
Andy Lehtonenip erseqqissarpaa silassap ilimasaarutigineqarnera ullut ungasilliartortillugit naatsoruminaassiartortartoq.