ajunaarnersuaq
DTU-mi pisortaq: Sumiiffinni allani ulorianartoqarnersoq misissornissaa pissusissamissoorpoq
Kalaallit Nunaanni sinerissami najugaqarfiusuni taamatut pisoqarsinnaaneranik ulorianartoqarnersoq misissorneqassappat, pissusissamisoortorujussuusoq Niels-Jørgen Aagaard, DTU Bygimi pisortaq isumaqarpoq.
Uummannap eqqaani tassaarsuaqarnerata kingorna DTU Bygimi pisortap, kiisalu ARTEK-mi aqutsisuusup, Niels-Jørgen Aargaardip, Kalaallit Nunaanni sumiiffinni allani taamatut pisoqarsinnaaneranik misissuinissaq pissusissamisoorsoraa.
Aamma atuaruk: Aajuku inuinnarnit maannamut tunissutigineqarallartut
- Sinerissami allami taamatut assingusumik pisoqarsinnaaneranik ulorianartoqarneranik ataqatigiissaaraluni nalilersuinermik aallartitsinissaq pissusissamisoorluinnartoq isumaqarpunga. Eqqarsaat tamanna pissusissamisoortoq isumaqarpunga, Niels-Jørgen Aagaard, Sermitsiaq.AG-mut taama oqarpoq.
Suliassaq annertooq
Taamatut oqaatigaluni imaaliallaannaq suliassaanngitsut oqaatigaa.
- Suliassaq annertuujuvoq, tassami qinngusersaaginnarluni suliassaanngilaq. Imaassinnaavoq atortut nutaaliat atorneqartariaqartut, qaammataasamit paasissutissaasinnaapput, sumiiffinnut assigiinngitsunut qaqqallu suunerinik ilisimasaqartunik pisariaqartitsisoqarsinnaavoq. Taamaammat weekendip ingerlanerinnaani naammassineqarsinnaanngillat, pisortaq oqarpoq.
- Soorlu Danmarkimi nuna tamakkerlugu uleruloortoqarnissaanut illersuuteqarneq assigaa, taakku sumi ulorianartoqassanersoq nakkutiginnittarput.
Sumiiffippassuit
Kalaallit Nunaanni illoqarfiit 16-iupput, nunaqarfiillu 60-iullutik, tamarmillu sinerissamiipput. Taamaammat sumiiffippassuit nakkutigisassaapput.
- Sumiiffippassuit alakkagassat amerlapput, kisianni soorunami ilaat allaffimmit suliareriaannaapput, inoqarfiit ilaat portusuumi inissisimammata imaluunniit qanittuini angisuunik qaqqaqannginnerat pissutigalugu, Niels-Jørgen Aagaard oqarpoq.