Siumut
Eqqissisimanngittuarsinnarput
Illuatungiliuttut Nunatsinni partiit annersaata iluani saqitsaanneq Naalakkersuisut sisamassaanik nikisinneqarnerannut peqqutaasoq qularinngilaat
Illuatungiliuttut Nunatsinni partiit annersaanni aaqqiagiinnginneq Naalakkersuisut sisamassaanik nikinnerannut peqqutaasoq nalilerpaat.
– Tukattumik aqutsineruvoq suullu tamarmik tuaviuussaapput. Sumut ingerlanersugut aqagulu qanoq pisoqassanersoq naluarput, Demokraatit siulittaasuat Randi V. Evaldsen oqarpoq nangillunilu:
– Illuatungaatigut nunanit allaniit aningaasaliisut oqaluuseraavut illuatungaatigullu attaveqarnermut naalakkersuisoq sisamassaa taarserneqarluni. Isumaqanngilanga tamanna akisussaassuseqartumik aqutsinerusoq.
– Partiimut inuiaqatigiinnut taamak annertutigisumik sunniuteqartumut taama imminut nittarsaanneq tulluanngilluinnarpoq. Naalakkersuisoqartariaqarpoq akisussaassutsiminnik ilisimaarinnittunik taama annertutigisumik akisussaaffeqaraanni, oqarpoq.
Partiip illuatungiliuttup allap Atassutip aamma Kim Kielsenip kingullertigut iliuusaa naammaginartinngilaa.
– Siumup Naalakkersuisullu siulittaasuata taama iliornera qinersisartunut toqqissisimananngilluinnarpoq. Aamma Vittus Qujaukitsoq ullaaq naalakkersuisuujunnaarniarluni oqariartuuteqarmat tupannaqaaq, Atassummit Inatsisartuni issiasutuaq Mala Høy Kúko oqarpoq.
Naalakkersuisunik nikisitsineq pillugu Sermitsiaq allaaserisaqagaatsiarsimavoq. Aviisi uani pisiarisinnaavat: