Erinarsoqatigiit sapaatip akunnerani tamannguaq appittassapput
Kujataani erinarsoqatigiit arfineq-marluk sapaatip akunnerani uani Qaqortumi katersuupput
Naak kujataani erinarsoqatigiit assigiinngitsut aqqanillit tikinnissaannik aaqqissuisut neriuutigisimasaattut anguneqanngikkaluartut, sapaatip akunnerata naanerani arfineq-marlunngornissaat neriuutigineqarmat Qaqortumi nuannaarneq ulluni makkunani malunnarpoq, sapaatip akunnera naallugu erinarsornermik erinarsortunillu aqutsinermik pikkorissartoqarmat.
Erinarsortartut 40-t missaat ullaaq takkussimapput. Sapaatip akunnerata ingerlanerani amerlanerit tikinnissaat neriuutigineqartoq, Kujataamioqatigiit Nipaata siulittaasua, Sika Frederiksen oqaluttuarpoq.
- Ingerlalluartorujussuuvugut. Erinarsornermik pikkorissarneq aallartipparput. Ataatsimoorluta ullaakkorsioqatigeereerat ilinniartitsisoq Janne Wind peqatigalugu sungiusarpugut, Sika Sermitsiaq.AG-mut aqaluttuarpoq.
Erinarsornermik erinarsortunillu aqutsinermik pikkorissarneq tallimanngorneq ilanngullugu ingerlanneqarpoq arfininngornermi Qaqortup Timersortarfissuani nereqatigiinnermik naggaserneqassalluni, tassani erinarsortorpassuaqarnissaa naatsorsuutigineqarpoq kingornalu qitimmik naggaserneqassalluni.
Erinarsoqatigiit Qaqortumit, Narsamit, Nanortalimmit aamma Narsarmijinit aggerfeqarput.