Kalaallit peqatigiiffiat
Fynimi kalaallit peqatigiiffiat inuusuttunik ujartuipput
Fynimi kalaallit peqatigiiffiat Umiaq ataatsimeersuarneranni ukiup siuliani aaqqissuunneqarsimasut assigiinngitsut takuneqarsinnaapput.
Nereqatigiinneq TUSA-p aaqqissugaanut busserneq, Tivoli Vejlemilu Juullimi Inuulluaqqusineq tamakkuupput fynimi peqatigiifiup ukiup ingerlanerani aaqqissuussimasaasa ilaat.
Peqatigiiffik 60-nik ilaasortalik ingerlalluarpoq. Peqatigiiffimmilu siulittaasup Arnánguaq Hansenip ilaasortat amerlanerutikkusukkaluarpai ingammik inuusunnerusunik.
- Peqatigiiffik amerlanerusunik tapersersorneqaraluarpat nuannissagaluaqaaq. Nuannernerussangaluarpoq amerlanerusunik inuusuttortaqaleraluarutta. Aaqqissuussanik nutarteriniarneq ajornakusoorsinnaasarpoq taamaammallu ilaasortat piumasaat maliinnarlugit aaqqissuisarluta, Arnánguaq Hansen Sermitsiaq.AG-mut oqarpoq.
Peqatigiiffiup uummarinnera siulersuisuniinnaq akisussaaffigineqanngilaq, Arnánguaq Hansen ataatsimeersuarnermi taama erseqqissaavoq.
Erinarsoqatigiit piumaneqartut
Peqatigiiffik erinarsoqatigeeqarpoq aaqqissuussanilu assigiinngitsuni peqataasarlutik soorlu Odensimi naalagiaqatigiinnermi, Vejlemi Juullimi Inuulluaqqusinermi aammalu Nordatlantisk Husimi arlaleriarsimapput.
Siulersuisunut ilaasortanngortut ukuupput:
- Arnánguaq Hansen, siulittaasoq
- Mina Lennert Petersen, siulittaasup tullia
- Emma Balslev, aningaaserisoq
- Cice Sterling, allatsi
- Grethe Jørgensen, siulersuisuni ilaasortaq
- Lars Peter Sterling, siulersuisuni ilaasortaq
- Emilie Rosbach, siulersuisuni ilaasortaq