Gallashow ukiamut kinguartinneqarpoq
Nanubørnikkut billettinik tunisakippallaarneq pissutigalugu 8. aamma 9. maj katersuiniarnissaagaluaq ukiamut kinguartinniarlugu aalajangerput.
Showi katersuiniarnerlu ukiamut ingerlanneqassaaq, tamannalu aliikkusersuisuusussat suleqatigisallu aningaasaliisullu tapersersoraat Nanumi aqutsisut nalunaarutigaat.
Aaqqissuisuusut billettinik tuniniaanerup ingerlanerliornera pisunit arlalinnit peqquteqartoq nassuiarpaat. Apersortitsinerup nalaaniippoq, aamma qinersisoqarnissaa qanittukkut nalunaarutigineqarmat immikkut ittumik ulapaarfiullunilu angalanernik annertuunik malitseqarpoq. Aamma ullut billettinik tuniniaaffiusut ikittuinnaasimapput, aliikkusersuisussani peqataasussat kingulliit pissarsiariniarneqaqqaartussaasimammata.
- Maannangaaq suliffeqarfinnit namminersortuniillu tapersersuerusuttunik nalunaartoqartalereerpoq, showi ukiamut ingerlanneqartussaq tapersersorlugu billettinik pisisalereerlutik. Arlallit suliffimmi julefrokosternissartik gallashowimut peqataanissamut taarsersimavaat. Nammineq kajumissutsiminnik suliumasunut aningaasaliisunullu showip matuma piviusunngorsinnaaneranut pingaaruteqarsimasunut siumoortumik qujareerpugut.
- Upperinilluinnarnerit isumallu aammalu tunuliaqutarisat akimorlugit suleqatigiinnikkut taamaallaat allanngortitsisinnaavugut, Nanu Børn tusagassiorfinnut nalunaarummi allapput.