GE ilinniartitaanermik aaqqissuusseqqinneq pillugu Namminersorlutik Oqartussanut: Suliarineqarnera arriippallaaqaaq
Sulisitsisut suliamik ingerlatsineq, ilinniartitaanermik aaqqissuusseqqinnermik malitseqartussaq isornartorsiorpaat, isumaqarlutillu suliassap pingaaruteqassusaa nunap ineriartortinneqarneranut naapertuutinngitsoq.
Nalunaarusiaq ”linniartitaanerup aaqqissuussaanera eqaatsoq ataqatigiittorlu” 200-nik quppernilik, suleqatigiissitat arfinilinnik inuttallit suliniumilu aqutsisullip ukiut marluk suliarineqarsimasoq misissorsimavaat, arlalinnillu inassuteqaateqarsimallutik, tunngavilersuisimallutik iliuuseqarsimallutillu.
- Nalunaarusiami allassimasorpassuit ilisimareerpavut, taamaammat qangali aallartinneqarsimannginnerat uggornarpoq, Kalaallit Nunaanni Sulisitsisut pisortaat Brian Buus Pedersen Sermitsiaq.AG-mut oqarpoq.
Tunngaviusumik unammillernartinneqartartut pingasut, ilinniartitaanermik aaqqissuusseqqinnissamut tunngaviusut aaqqiissuteqarfiginiarlugit, suliassat aallartinneqarnissaat pingaarnerutinneqarsimannginnerat tupigusuutigivaa.
1. Meeqqat Atuarfiata pitsaassuaa
2. Inuusuttorpassuit Meeqqat atuarfianniit ingerlaqqillutik inuusuttut ilinniarfiini ilinniagaqalerneq ajortut
3. Ilinniartorpassuit inuusuttut ilinniarfiini ilinniarnerminnik naammassinninneq ajortut.
- Ajoraluartumik suliassaq ukkatarinnilluni sukkasuumillu suliniuteqarnissamik pisariaqartitsinermit aporfeqartinneqartarsimavoq, Sulisitsisit nalunaarusiami nutaami inassuteqqatinut oqaaseqaateqarlutik allapput.
Ataatsikkut suliariniakkat ingasappallaartut
- Suliaq aallartinneqarmalli qulaanit aqunneqarpallaarnerarlugu, suliarinissaanut piffissaliussaq sivisuallaarneralugu sorpassuillu ataatsikkut qulaajaaffiginiarlugit suliassat annetuallaarnerarlugit isornartorsiuisarsimavugut, Brian Buus Pedersen oqarpoq, erseqqissaatigalugulu Sulisitsisut nalunaarusiamut oqaaseqaateqarnerminni allassimasut IMAK sulisitsisullu naammaginartumik tusaaniarneqarsimanngitsut.
Pappialatigut isikkoraluarpoq, kattuffiit suliami malinnaatinneqarsimasut, tamannali assigiinngitsorpassuit pissutigalugit pisinnaasimanngilaq. Ingerlatsineq Ilinniartitaanermut Naalakkersuisoqarfimmit aqunneqarpallaarsimavoq, aamma Sulisitsisut isumaat malillugu suliaqarfimmi pingaarutilimmik suliallit allat oqaloqatigineqarumasimanatillu peqataatinneqarumasinngillat.
Nalunaarusiami inassuteqaatigineqartut oqallissaarutinit tallimanik, meeqqat atuarfiini pisortanit, ilinniarnertuunngorniarfinni rektorinit, inuussutissarsiutitigut ilinniarfiit ataatsimut siunnersuisoqatigiivinit, ilinniartitsinermik ilisimatusarfimmit, naalakkersuisoqarfinnit inuusuttunillu Facebookikkut oqallisigineqarsimasunit tunngaveqarput.
Sulisitsisut suleqatigiissitanut suliaqartunulluunniit toqqaannartumik peqataasimanngillat, malinnaatitanili peqataasimapput isummaminnik tunniussaqarsinnaasimallutik.
Sulisussanik suli amigaateqarnermik kinguneqartoq
Sulisitsisunit erseqqissaatigineqarpoq, inassuteqaatini nalunaarusiami naammassillugu suliarineqarsimasumi isummatik akissuteqarfigineqarsimanngitsut.
Sulisitsisut isumaqarput, unammillernartut taakku pingasut, misissueqqissaarnermut tunngaviusut isumagineqanngippata, inuiaqatigiit aningaasaqarnermikkut inuttullu annaasaqangaatsiassasut. Tamtuma malitsigisaanik sulisussanik suli amigaateqartoqassaaq, taamalu sulisussanik avataanit tikisitsisoqartariaqassalluni.