Greenland Express: Angallasserngaarneq iluatsippallaanngitsoq

Nassatat arfinillit, ilaasorineqartut 15-it, aviisinillu agguaassinermi pisortaq kisimi nuisasoq. Greenland Express Airip Danmarkimit Islandikkoorluni Kalaallit Nunaaliarnera taama isikkoqarpoq, Danmarkillu ullaavani angallassineq aallartippoq. Timmisartoq angallasserngaarnermi ilaasoqarpianngilaq, oqaaserlu ataaseq kisimi atorneqarsinnaavoq: Iluatsippallaanngilaq.

Ullaakkorsiornermi najuuttoqarpianngilaq
Timmisartuutileqatigiiffiup angallasserngaarnera Aalborgimi nalunaaqutaq 08.00 aallartippoq, ilaasorineqartussanut tassani ullaakkorsiutinik tunioraasoqarpoq. Tassanngaanniillu amigaatigineqartoq saqqummerpoq: Ilaasoqarpallaanngilaq. Ullaakkorsiutit juicellu assigiinngitsut tiguneqarsinnaapput, Aalborgimiillu ilaasut qulit ilaasorineqarput. Taamaattumik misigisaq pikkunaakujuppoq. Timmisartoq siullermeerluni Københavniliarpoq.

Angallassisarneq ammaqqaartutut malunnanngilaq, matungajalertutulli isikkoqarnerulluni, naatsorsuutimmi annertugaluarput. Greenland Express Airip sulisuini Gert Brask kisimi takussaavoq, inuttaatali soqutigerpasippallaanngilaa ilaasuminut oqaaseqarnissani. Aviisit saqisunut tunniutereeramigit biilinik ingerlavoq, saqqummeqqinnanilu.

Timmisartoq qanganisaq, sullissineq pitsaasoq
Gert Braskip nammineerluni maluginngilaa ilaasuni qanoq Københavniliarnersut. Timmisartumi inuit 15-it ilaasorineqarput, nassatarineqartut arfiniliupput. Sermitsiamit ilaasut taakkunani marluk nassatarai meeqqallu marluk ilaaqatigalugit. Aamma hollandip timmisartuutileqatigiiffianit Denim Airimit ilaasoqarpoq. Taassuma timmisartumi aquttut oqaluutingaatsiarpai, timmisartoq qanoq orsussaqartiginersoq eqqartorneqarluni. Københavnimi unillatsiarnermi oqarasuaat angallattakkatigut oqaluussingaatsiarpoq.

Denim Airip timmisartuutaa Greenland Express Airip attartugaraa. Naak timmisartup qalipaataa nutaajugaluartoq timmisartup ilua nutaaliaavallaanngilaq, nipilersuummik tusarnaartoqarsinnaanngilaq, arlaannik aliikkutaasinnaasumik sammisaqartitsisoqarsinnaanani, taamaattumik nammineq angalanermi aliikkusersorniartariaqarpoq. Taamaattumik akunnerni sisamani - tallimani timmisartut angallassisartunut timmisartoq assersuunneqarsinnaanngilaq.

Timmisartup saqisui Denim Airip qalipaataanik atorlutik saqipput, akikitsumillu angallassisartunit Ryan Airimit aamma IberiaExpressimit allaanerulluni. Københavnimit Reykjavikkiliarnermi akeqanngitsunik nerisassanik sassaalliisoqarpoq, akeqanngitsumik imertortoqarsinnaavoq, kaffisorluni thetorluni kiisalu tamulugassartorluni. Timmisartumi aquttup aamma ilaasut oqaloqatigisarpai.

Naak Denim Airimi saqisut pitsaasumik sassaalliigaluartut timmisartuussineq pakatsinarpoq. Apeqqutaaginnalerpoq qaqagu Gert Braskip qaqagu timmisartuutileqatigiiffik unitsinnissaa.