akitsuutit nutaat
Hans Enoksen akitsuuseeqqinnissamut akerliuvoq
Akitsuutit nutaat Inatsisartuni akuerineqassappat kingulernissaat Inatsisartuni attaviitsup Hans Enoksenip ernummatigaa
Sanaartornermi qamussuit snescooterillu akitsuuserneqarnissaannik siunnersuut naalakkersuisut Inatsisartuni upernaamut saqqummiuppassuk attaviitsoq Hans Enoksen akerliulluni taasiniarpoq. Inuuniarnermi aningaasartuutit qaffanissaat Hans Enoksenip ernummatigaa.
Inatsisartut upernaamut katersornissaanni naalakkersuisut siunnersuutiginiarpaat snescooterit ukiumut 900 koruuninik sanaartornermilu qamussuit 2.000 kilo sinnerlugu oqimaassusillit ukiumut 19.876 koruuninik akitsuuserneqassasut.
Siunnersuut inuussutissarsiortunit akerlilerneqarpoq tassani ilimagineqarmat aningaasartuutit millionilikkuutaanik qaffannissaat. Siunnersuummut attaviitsoq Hans Enoksen aamma akerliuvoq.
- Sanaartortut akitsuusinermut akiliisinneqartalissappata soorunami aamma sanaartornikkut suliassat akisunerulernerannik kinguneqassaaq, ilaatigullu aamma ilaasa suliaminnik annikillisaanissartik toqqartariaqalissavaat, tamatumalu kingunerissavaa suli sanaartornerup iluani allanilu suliffissaaruttut amerlanerulernerat, Hans Enoksen oqarpoq.
Nunaqarfiit eqqungaassapput
Hans Enoksen Itillimi najugaqartoq Pilersuisumilu sulisuulluni aarleqquteqarpoq qamuteralaat sanaartornermilu qamussuit akitsuuserneqarpata nunaqarfinni inuuniarneq akisunerulissasoq.
- Pilersuisoq annertuumik akitsuummik eqqorneqartussangussaaq, tamatumalu kingunerissavaa nioqqutissat aamma nunaqarfinni akitsornissaat kiisalu aamma nunaqarfiup iluani sullissinerit aamma akisunerulissapput tamannalu nunaqarfimmiuni aamma inuuniarnikkut eqquisussaavoq tamannalu tapersersornanngilluinnarpoq, Hans Enoksen oqarpoq.
Taanna isumaqarpoq landskarsip iseritai amerlissappata allatut eqqarsartoqartariaqartoq.
- Inuit kaasarfiinik aningaasanik ujarlerunnaarluta inuussutissarsiornikkut suliffissatigullu periarfissanik ujarlerniarta, sapinngisamillu aningaasarsiorfiusinnaasut imminullu pilersornissamut periarfissat annertusarneqarniarlik, inuit kaasarfiinik aningaasanik aallerniarnerit annassutigineqarsinnaanngillat, Hans Enoksen oqarpoq.
Siunnersuut malillugu snescooterit sanaartornermilu qamussuit akitsuusernissaanni savaatillit ilanngunneqanngillat.