Hollywoodimi filmiliaq kalaallinik inuttassarsiortoq
Filmimi nutaami Ben Stillerimit ilitsersorneqartumi kalaallit isiginnaartitsisartut marluk atorfissaqartinneqarput. Maajip 13-iani Nuummi piukkunnartussarsiortoqassaaq
Isiginnaartitsisartut nunatsinneersut marluk Hollywoodimi filmiliamut "The Secret Life of Walter Mitty"-mut Ben Stillerimit ilitsersorneqartumut qaqutigoortumik peqataanissamut periarfissaqalerput.
Filmi maannakkorpiaq New Yorkimi immiunneqaleruttorpoq. Filmip ilaa septembarimi Islandimi immiunneqassaaq.
Filmiliortunit isiginnaartitsisartut marluk atorfissaqartinneqarput. Uku piumasarineqarput:
Kalaaleq helikopterertartoq: Angut 40-60-inik ukiulik. Taanna qulimiguulimmik allakkani umiarsuarnut aatsisartuuvoq Walterilu ilaasoralugu umiarsuarmut "Ship to Shore"-mik atilimmut ingerlaarluni. Filmimi takutitassat immikkoortut marluk Islandimi septembarimi immiunneqassapput.
Kalaaleq arnaq allakkerivimmi sulisoq: Arnaq 30-60-inik ukiulik. Walterip Kalaallit Nunaannut tikinnerata kingorna apeqqutai akissavai. Filmimi takutitassaq ataaseq Islandimi septembarimi immiunneqassaaq.
Soqutiginnittunit ”Casting Nuuk The Secret Life Of Walter Mitty” attavigineqarsinnaavoq mittycasting@gmail.com aqqutigalugu. Taamaalilluni piffissamik misilitsiffiusussamik piareersagassamillu pissarsisoqassaaq. Aamma Nuummi Hotel Hans Egedemut takkuttoqaannarsinnaavoq sapaatiuppat maajip 13-iani nal. 15.00-imiit 18.00-imut.
”The Secret Life Of Walter Mitty” pillugu tuluttut annerusumik atuarit maani