IA-p sulisartut ulluanni feminisme ujartorpaa

- Ersoqatigiinneq, ataatsimoorneq, kivitseqatigiinneq, assigiimmik suliaqarnermi naligiimmik akissarsiaqartitaaneq, sulisartut isumaqatiginninniarnissamut kiffaanngissuseqarnerat, suliffeqarfeqarneq tamanik inissaqartitsisoq. Tassa maajip aallaqqaataasiornerni oqaatsit tusartuartakkavut. Oqaaserli ataaseq puigorneqaraluttuinnarsimavoq: Feminisme. Piffissanngorpoq feminismep uummarissaqqinnissaanut, aamma suliffeqarfeqarnermi naligiissitaaneq pillugu.

Inuit Ataqatigiit siulittaasuat Sara Olsvig sulisartut ulluanut atatillugu ullumi marlunngornermi taama allappoq.

Suliffeqarfinni ilaqutariiussutsimut politikki

Partii meerartaarnermi sulinngiffeqarnissamut aningaasaateqarfimmik pilersitsinissaq, ataatat immikkut meerartaarnermi sulinngiffeqartarnissaannik, sulinngiffeqarnerup sivitsornissaanik minnerunngitsumillu suliffeqarfinni ilaqutariiussutsimut ersarissumik politikkeqartalernissamik anguniagaqarpoq. Sara Olsvigimi naapertorlugu suliniutit taakkua meeqqatta toqqissisimanartumik inuunermik aallartitsinissaannut minnerunngitsumillu arnat angutillu suliffeqarfeqarnermi naligiissitaanerunissaannut aqqutissiuussissapput.

- Suliffeqarfeqarnermimi sulisartoqatigiit qiviarutsigit, angutit arnallu akornanni agguaqatigiisillugu akissarsiaqarnikkut nikingassutsip annertussusaa maluginianngitsoorsinnaanngilarput, soorluttaaq “arnanit suliffigineqakkajuttut” “angutiniillu suliffigineqakkajuttut” akissarsiaqarnikkut naligiinngissusaat maluginiarneqanngitsoorsinnaanngitsoq.

Politikki suli angutit silarsuarivaat

- Isumaginninnermi siunnersortit akissarsiat pillugit isumaqatiginninniarneranni kingullermi ileqqutoqaasut qimannissaannut aqqutissiuussilaarsimapput. Arnalli “suliffigikkajunnerusartagaanni” allani atukkat suli kinngussaaqqaqaat. Nunatsinni Perorsaasut Kattuffiata qineqqusaartitsineranni nammineq tamanna aamma erseqqissuliaraat. Sooq bussertitsisoq perorsaasumit 8000 koruuningajannik akissarsiaqarnerua? Sara Olsvig aperivoq.

Sara Olsvigip tikkuarpaa politikki suli angutit silarsuaringaat, soorlu suliffeqarfeqarneq ataatsimut isigalugu suli angutit silarsuaattut ittoq

- Immikkut malugisimasara tassaavoq suleqatinit angutinit, aammalumi arnanit, suliffitsinnut atatillugu naartuneq anaanaanerlu pillugu qanoq politikerit arnaasugut oqaaseqarfigineqartartiginersugut. Angutimmita aamma taamannak oqaaseqarfigineqartarpat?

Feminisme puigorneqassanngilaq

- Asasakka arnat. Suli sorsuutissaqaqaagut. Feminisme puigorneqassanngilaq. Niviarsiaqqammi nukappiaqqallu naligiimmik ilinniartitaanikkut periarfissaqarnissaannit annerusumut pingaarnerusumullu tunngavoq. Allaammi ilinniartitaanikkut naligiinnerulersimagaluarluta suliffeqarfeqarnermi naligiissitaaneq suli angunngilarput. Feminismelu aamma angutinut pingaaruteqarpoq. Angutimmi aamma nuliatik, aappatik, anaanatik, panitsik qatanngutitillu suliffeqarfeqarnermi atugarissaarnissaat minnerunngitsumillu angutituulli naleqartinneqarlutik akuerineqarnissaat soqutigisaraat, Sara Olsvig oqarpoq.