Ikiaroornartut pillugit inatsisissatut siunnersuut allanngortinneqartoq

Ikiaroornartut pillugit inatsisissatut siunnersuut tusarniutigineqartoq, naammaginanngitsumik imaqarsimanera pissutigalugu, atorunnaarsinneqarpoq. Peqqissutsumillu naalakkersuisoqarfik nutaamik inatsisissatut siunnersuummik tusarniutitut nassiussaqarpoq.

- ”Ikiaroornartut pillugit Inatsisartut inatsisaannut siunnersuut” tusarniaassutitut Peqqissutsimut Naalakkersuisoqarfiup matumuuna nassiuteqqippaa. Siunnersuutip UPA2020-mi saqqummiunneqarnissaa naatsorsuutigineqarpoq. Tamatumunnga ilutigitillugu tusarniaanermi paasissutissiissutit 21. november 2019-imi nassiunneqartut atorunnaarput.

Namminersorlutik Oqartussat nittartagaanni tusarniutit allattorsimaffianni, sammisaq pillugu tusarniutigineqarfiani, marlunngornermi decemberip qulingani saqqummiunneqartumi taama allassimavoq.

Ikiaroornartut pillugit immikkoortoq

Inatsisartut inatsisissaattut siunnersuummi paragraf siulleq allanngorujussuarpoq.

- Inatsisartut Inatsisaanni ikiaroornartut pineqartut tassaapput: amfetamin, ecstacy, fantacy (GHB), hashi, heroini, kokaini, LSD, pupiit, Poppers.

Inatsisissami juulip aallaqqaataani 2020-mi atuutilersussami paragraf siulleq taama allassimavoq. Taannali peerneqarpoq, imalu allaqqasoq ikkunneqarluni:

- Naalakkersuisut aalajangersaasinnaapput ikiaroornartut tamatumunnga ilanngullugit ikiaroornartut assigiinngitsut, nunat tamalaat akornanni aalajangersakkat naapertorlugit imaluunniit Nunatsinni Nakorsaaneqarfiup naliliinera tunngavigalugu aanngajaarniutitut sunniuttarnermikkutimmikkut navianaateqartumik sunniuteqarsinnaasut, ikiaroornartut akui imaluunniit taamatut akoqartutut ilimagineqartut, maani nunami pigineqassanngitsut, imaanngippat Naalakkersuisut pissutsit immikkut illuinnartut atuutsillugit tamatumunnga akuersissuteqarlutik.

Inatsimmimi ikiaroornartut tamarmik pineqartussaapput.

- Inatsisissatut siunnersuummi siullermi ikiaroornartut taaneqartut allarpassuarnik suli peqarpoq. Taamaattumik allanngortinneqarpoq, inatsit tamakkiisumik aallaaveqartussanngorlugu, Tine Pars, peqqissutsimut naalakkersuisoqarfimmi pisortaq oqarpoq.

Cannabisolie pillugu qasukkaaneq

Inatsisissaq nutaaq naapertorlugu cannabisuuliat aamma nioqqutissat CBD-mik uuliartaqartut pisiarineqarsinnaanerat pigineqarsinnaanerallu ajornannginnerulaalissaaq. Taakkumi inatsimmut peqataatinneqassanngillat, THC-imik 0,2 procent ataallugu akoqarpata.

Siunnersuummi immikkoortut pigaarnerit ukuupput:

• Pingaarnermik pineqartoq tassaavoq inatsit sinaakkusiisoq, tassani Naalakkersuisut ikioroornartunik atuinissaq pillugu malittarisassanik sukumiinerusunik aalajangersaanissamut piginnaatinneqarput aamma aalajangiisinnaatitaapput ikiaroornartortallit aalajangersimasut nunatsinni pigineqassanngitsut.
• Siunnersuutigineqarpoq eqqussineq annissinerlu, tunisineq, pisineq, tigusineq, sananeq, suliarinninneq pigisaqarnerlu Nunatta Nakorsaataasivianut napparsimmaviillu nakorsaataasiviinut kiisalu inunnut suliffeqarfinnullu, Naalakkersuisunit akuersissummik pisimasunut, inerteqqutaassanngitsoq
• Siunnersuutip nassatarisaanik malittarisassat cannabisimik atuinermut tunngasut ilaatigut qasukkarneqarput, tassami nalunaarut aqqutigalugu cannabisuuliat imaluunniit nioqqutissiat CBD-uuliamik akullit pillugit malittarisassat naleqqussarneqassapput, taamaalilluni tunissassiat tamakku 0,2 % sinnerlugu THC-mik akoqanngikkunik inatsimmut ilaatinneqassanatik.

Tusarniutigineqartup akissuteqarfigineqarnissaanut ulloq kingulleq tassaalerpoq januaarip arfernat 2020.