Ilaasunut pitsaanngorsaanerit annertuut Kangerlussuarmi
Tallimanngormat Kangerlussuarmi mittarfiup illorsuartaa nutaaq Jens B. Frederiksenimit atoqqaartinneqarpoq
Tallimanngormat ullup qeqqanut Ineqarnermut, Attaveqarnermut Angallannermullu Naalakkersuisup Jens B. Frederiksenip Kangerlussuarmi tikittarfimmi qalersat marluk qiorpai: Allermi siulleq aappaalu qullermi nutaarluinnarmi. Taamaalilluni mittarfimmi ilaasunut tikittarfik annertuumik erseqqissumillu iluarsiivigineqarpoq, Mittarfeqarfiit tusagassiuutinut nalunaaruteqarlutik allapput.
Qullermi nutaarluinnarmi nunanit allaniit tikittut aallartussallu inersuaani kaffisorniartarfeqarlunilu meeqqanut immikkoortortaqarpoq, inissaqarluarlunilu eqqissisimaarfiusinnaasumik imaluunniit interneterluni.
Nunami namminermi angallannermi aniartortarfik nutaaq aqqutigalugu nunatsinni timmisartunut ikiartorneq siunissami pilertornerusumik ingerlanneqartalissaaq.
- Inuiaqatigiit kalaallit attaveqarnikkut periarfissaginnerulernissaat Naalakkersuisut sulissutigaat. Angallanneq sukkasuumik ingerlanneqarsinnaassaaq, naatsorsuutigineqarsinnaalluni akikitsuullunilu aammali atoruminarluni. Nutaamik tikittarfeqalernikkut utaqqisariaqartarneq iluarnerulissaaq, aliannaarsaarnissamut, pinnguarnissamut imaluunniit sulinissamut periarfissaqarluni - tamanna pisariaqartikkaani kissaatigalugulu, Jens B. Frederiksen atoqqaartitsinermi oqarpoq.
Ingammik isumannaallisaanikkut misissuivimmi ’matoqqasumi’ iluarsiissutit ilaasunit soqutigineqassagunarput:
- Maannamut isumannaallisaanikkut misissortereerluni ilaasunut nuannerpallaarneq ajorpoq, mittarfiup pisortaa Rita Müller oqaluttuarpoq.
- Utaqqiinnartoqartarsimavoq inissaqarpiarani. Siunissami nerisoqarsinnaalissaaq imeruersarluniluunniit meeqqallu pinnguarsinnaallutik, inissaqarnerulerpormi. Pujortartaraanni anisoqarsinnaavoq timmisartumut ikinissap utaqqiisaa, mittarfiup pisortaa ilisimatitsivoq.
Piffissap sivikitsup ingerlanerani Kangerlussuarmi mittarfimmi inuit 500 missaat aqqusaarajuttarput, tamassumalu ilaatigut kingunerisarpaa isumannaallisaanikkut misissortinnissamut utaqqisoqartarnera issiavissallu pilerngunneqarlutik.
- Ajornartorsiutit tamakku annikinneerarsuanngussapput maannakkummi inissaq 500 kvadratmeteri sinnerlugu allilerneqarpoq, Rita Müller tusagassiutinut nalunaarut tunngavigalugu ilassusiivoq.
Kangerlussuarmi tikittarfiup allilernera suleqatigiinnikkut ingerlanneqarpoq namminersorlutik oqartussat sanaartornera akilerlugu, kingornalu ingerlannera aserfallatsaaliorneralu Mittarfeqarfinnit ingerlanneqalissalluni. Allilerinermi aningaasartuutit katillutik 27 million krouuniupput, Air Greenlandillu nunami namminermi angalasut aallariartortarfiata sananerani 4 million koruunit affai akilerlugit.
- Kangerlussuarmi ilaasunut periarfissat nutaat annertuumik alloriarnerupput, Mittarfeqarfiup pisortaa Niels Kreutzmann naliliivoq.
- Mittarfinnik atoruminarsaanermik aaqqissuussaanitsinnillu naleqqussaanermik siunissamullu tulluarsaanermik suliaq ukiup ataatsip matuma siorna aallartipparput, ullumikkullu suliap taassuma inerneri siulliit annertuut takusinnaagatsigik nuannaarutigeqaara. Ineqarnermut, Attaveqarnermut Angallanermullu Naalakkersuisoqarfik Air Greenlandilu qutsavigerusuppakka suleqataalluarsimanerannut. - Anguniartuarsimavarpummi angalasunut tamanut pitsaanerusumik atugassaqartitsinissarput, oqarpoq.
Asillisat mittarfiup illutaani nutaameersut tamaasa takukkit.