Ilinniartut najugaqarfiat atoqqaartinneqarpoq
Ilinniartitaanermut naalakkersuisup Mimi Karlsenip tallimanngormat Nuummi ilinniartut najugaqarfiat nutaaq atoqqaartippaa.
Inuusuttut amerlanerpaat ilinniagaqalersinnaaqqullugit ilinniartut najugaqarfiinik amigaateqarneq naalakkersuisut annikillisarniarpaat. Nuummi ilinniartut najugaqarfiat nutaaq Mannguaaraq 29-miippoq ilinniartunullu 42-nut inissaqarluni, taakkunanngalu tallimat innarluuteqartunut tulluarsagaallutik.
Ilinniartut najugaqarfiat sinerissami ilinniartunut inissaavoq illoqarfimmi najugaqarfimminni ilinniarfissamik nassaarsinnaanngikkaangata.
- Inuusuttut allaat 15-inik ukioqartut ungasissumiit ilaquttatik qimallugit ilinniariartariaqartarmata ilassilluarneqarnissaat pingaartuuvoq. Taamaattumik angerlarsimaffik aamma inersimasumut inissaqarpoq, taannalu inuusuttunut 18-it inorlugit ukioqartunut attaveqaataassaaq, tusagassiuutitigut nalunaarummi allassimavoq.
Atoqqaartitsineq pivoq tallimanngornermi nalunaaqutaq 14.30.