Ilisimasallit: Kommunaldirektøri attassiinnarsinnaanngilaq

Kommunaldirektørip Lars Møller-Sørensenip Kommuneqarfik Sermersooq sinnerlugu professor Ole Helby Petersen Roskilde Unicersitetimeersumut eqqartuussassanngortitsinera pisoq qaqutigoortuuvoq.

Suliaq immikkuullarissoq
- Suliaq immikkuullarilluinnarpoq, immaqalu aamma siullersaalluni, inuiaqatigiilerinermi ilisimatusarnermut pisortaq, Ph.D. aamma cand.scient.pol, Roger Buch, Dammarks Medie- og Journalisthøjskolemi Aarhusimeersoq oqarpoq.

Nunatsinni naalagaaffiup sinniisorisimasaa, Steen Spore, assigalugu suliaq nangaanartoqartoq isumaqarpoq. Allaat arlalitsigut ajornartorsiutitaqarpoq.

- Siullermik suliaq inatsisitigut nangaanartoqarpoq, kommunip suliamut taama ittumut aningaasanik atuisinnaagunanngilaq. Kommunip ilisimatuup suliamik naliliinera isumaqatiginnginnera pissutigalugu, kommunit aningaasanik atuinissamut piginnaaffeqanngimmat. Kommuni suliaq pillugu ammasumik nassuiaateqaannartussaavoq, innuttaasullu nammineerlutik kina upperinerlugu aalajangissavaat, ilisimatusarnermut pisortaq, Roger Buch, Sermitsiaq.AG-mut taama oqarpoq.

Tamat oqartussaanerannut ajornartorsiut
- Aappaattut suliaq tamat oqartussaanerannut tunngatillugu akunnakusoortoqartorujussuuvoq. Demokrati aamma aqutsineq nutaajusoq paasiuminaatsorujussuuvoq, kommunit aamma pisortani oqartussaqarfiit ilisimatoortarpassuatik aningaasaaterpassuatillu pissutigalugit pissaaneqartorujussuupput, ingammillu tamakku borgmesterinut pissaanilinnullu allanut iluaqutaasarput. Ilisimatuut isornartorsiuisutut atuussinnaapput, aamma kommunit oqartussaqarfiillu eqqortuliornerarlutik eqqartuussivilersuleraangata, taava demokratii suli equnganerulersinneqartarpoq, Roger Buch Sermitsiaq.AG-mut oqarpoq.

Roger Buch suliami pingajuattut ajornartorsiummik ilanngussaqarpoq:

- Pingajuattut politikkikkut aalajangiinerni ataasiinnarmik eqqortoqartarnera qaqutigoorpoq. Assigiinngitsunik innimilluni, aamma arlalissuarnik nalilersuinermik oqimaaqatigiissaarineruvoq. Kommunip piviusoq kisermaatilerniarsarineranut ilisimasanik paasisanillu paasinninneruvoq. Suliap aamma ilisimatuut tamat oqartussaaneranni pingaarutilimmik attumassuteqanngitsumik ilisimasanik isornartorsiortunik aaqqiissuteqarnissaminnut ajoraluartumik qunulersissinnaavai, Roger Buch isumaqarpoq.

Allat qisuariartariaqartut
Steen Spore assigalugu Roger Buch isumaqarpoq, oqartussaqarfiit allat qisuariartariaqartut ''attuumassuteqanngitsumik ilisimatusarnermut, aamma ilisimatuut tamanut ammasumik oqallinnermut tapertaallutik pisinnaatitaaffiat - pisussaaffiatalu - saassunneqarnerannut unitsitsisariaqartut'', ilisimatusarnermut pisortaq taama oqarpoq.

Nunatsinni 1992-mit 1996-mut naalagaaffiup sinniiserimasaa, inatsisileritooq Steen Spore, Sermitsiaq.AG-mi oqaaseqartarfimmi allappoq:

- Kommuninut nakkutilliisoqarfimmut suliassaasimassaaq, kommunip eqqartuussassanngortitsineq unitsittariaqaraa, taakku Kalaallit Nunaanni aamma kommunit ingerlatsinerannik suliaqartarput, Steen Spore allappoq, imalu ilanngussaqarpoq:

- Suliap tamatuma ingerlanneqarneranut akiliutissaq tamatuma kingorna kommunaldirektørimut akisussaaffigitinneqartariaqarpoq.

Siunnersuineq pitsaanngitsoq
Kommunip eqqartuussissuserisuata, Advokatfirmaet Malling & Hansen Dammip, Lars Møller-Sørensenip suliamik ingerlatsinnginnissaanut siunnersuisimasariaqaraluartoq, Steen Spore isumaqarpoq.