Illersuisoorusuttorpassuit
Maanna siullermeersumik piumasarineqalerpoq kalaallit illersuisut illersuisutut ilinniagaqarsimassasut, taamatut allappoq dr.dk.
Inunnik ilinniarsimasunik amigaateqarneq pissutigalugu Kalaallit Nunaanni eqqartuussiviit ukiorpassuarni inunnik inatsisilerisuutut tunuliaqutaqanngitsunik sulisoqartarsimapput. Maanna siullermeersumik piumasaqaataalerpoq tamakkua ilinniagaqarsimasuunissaat.
Tamatuma kingunerisaanik illersuisartutoqqat ilaat tunuarsimapput arlalissuillu nutaat, ilarpassui arnat, illersuisunngorsimallutik.
- Kalaallit Nunaat sivisuumik illersuisunik amigaateqarsimavoq, pitsaasuuvorlu maanna nutaat taamak amerlatigisut pigineqalermata, Peter Mathiassen oqarpoq.
Pinngitsuusunut eqqunngitsuliorsinnaaneq
Taanna nammineq ukiuni 40-ngajanni illersuisutut sulisimavoq arlaleriaqalunilu suaartaatigisarsimallugu illersuisut ilinniagaqartinneqarnissaat. Illersuisut pitsaanerusumik tunngavissaqanngippata pinngitsuusunut eqqunngitsuliorsinnaaneq tikkuartortarsimavaa.
Peter Mathiassen 1960-ikkut naalerneranniilli eqqartuussiveqarfimmi sulisimagaluarluni inatsisilerituutut tunuliaqutaqanngilaq, pisiniarfimmi pisortatut ilinniagaqarsimavoq oqalutsitullu sulilluni.
Taamaattumik ilinniagaqarnissamik piumasaqaat nutaaq akuersissutigineqarmat illersuisooqatitoqqanilu ilinniartariaqarpoq, suliniummi pisortaq Marie Løkke Rasmussen oqarpoq:
- Misilittagatoqqat amerlaqisut ingerlalluarput, ajoraluartumili aamma ilaqarput angusinngitsoortunik.
Pikkorissartut pingajorarterutai naggataarutaasumik misilitsinnermi angusinngillat, tamakkua ilaat ukiuni arlalissuarni illersuisutut sulisimagaluarlutik.
Pillarnagit
Nunatsinni eqqartuussisoqarneq nunarsuarmi pitsaanerpaatut taaneqartarsimavoq, pissutigalugu pinerlussimasut pillarnagit inuiaqatigiinnut akulerutseqqinniarneqartarmata.
Inuiaqatigiinnguani ikittuni inuit ilinniarsimanngitsut atorneqarnerat nukittorsaatitut erseqqissaatigineqartarsimagaluarpq, pinerluttarnerilli sakkortusisimapput inatsillu katitigaanerulersimalluni. Taamaattumik ilinniagaqartitsinissaq maanna pisariaqartinneqalersimavoq, Marie Løkke Rasmussen oqarpoq.
Taassuma iluaralugu tupaallaatigaa taamatut amerlatigisut ilinniagaqarfimmik nutaamik soqutiginninnerat:
- Taxartartut, politiiusimasut, ilinniagaqartut - inuusuttut utoqqasaallu - qinnuteqarsimapput.
Arnat illersuisutut
Illersuisartutoqqat tassaanerusarsimapput angutit utoqqasaat, taamaattumik Marie Løkke Rasmussenip nuannaarutigaa arnat inuusuttut amerlasuullu tamatuminnga soqutiginnissimammata, tamaasilluni angutit arnallu maanna amerlaqatigiipajaarlutik.
Kalaallit Nunaanni illersuisut nunaqarfeerarmiuugajuttarput pinerluffigineqartut, ilaqutaat pinerluttorlu naapeqqittarlugit. Inuit nunaqqatigiinni nuannarineqanngeqisut illersorsinnaassavaat, inuttullu iluarinninnerit iluarinninnginnerillu tunulliussinnaassallugit. Tamanna ajornakusoorpoq, anguniagarli taannaaginnarpoq:
- Manna aningaasarpassuarnik pissarsiutigisinnaanngilaat imaluunniit eqqartuussissuserisullammanngorsinnaanatik, inuilli tunniusimasuupput Kalaallit Nunaannik ikuerusuttut, Marie Løkke Rasmussen oqarpoq.