Illoqarfinni suliffissaaleqisut ikinnerusut
2007-imi qaammatit siullerni qulingiluani qaammammut agguaqatigiisillugu 1500-t suliffissaarusimasuusarput. Ukiumit siulianit 50-inik ikinnerupput.
Taakku sulisinnaasut tamarmiusut 5,5 pct-eraat, 2006-imi 5,7 pct.-iusimalluni, Kalaallit Nunaanni Naatsorsueqqissaartarfik nalunaarpoq.
Suliffissaaleqisuni amerleriaat qaffasinnerpaaq Ammassaliup kommuneani pisimavoq, tassani sulisinnaassusilinnit tamarmiusunit suliffissaarusimasut 2006-imi 6,8 pct.-imiit 2007-imi 11,0 pct.-imut qaffariarsimagami.
Qaffariaat taanna ilaatigut Arctic Greenfood-ip Kuummiuni fabrikiata matuneranik aammalu KNI-p Nukissiorfiillu Tasiilami eqqaanilu sulisunik ikilisaasimaneranit peqquteqarpoq.
Qeqertarsuarmi Ilulissanilu suliffissaarusimasut ikinnerpaapput, taakkunani tulleriinneri malillugit 2007-imi qaammatini qulingiluani siullerni suliffissaarusimasut 16-iusimallutik, tassa sulisinnaassusillit 2,6 pct.-ii, aammalu suliffiissaarusimasut 73-it, tassa sulisinnaassusillit 2,7 pct.-ii.
Aamma ikinnerit suliffissaaleqinermit eqqorneqarsimapput. Illoqarfinni kvartalit pingajussaanni inuit agguaqatigiisillugu qaammammut uliffissaarusimasuusut 2.239-iusimapput, 2006-imi 2.420-iusimallutik. Tassa 2007-imi sulisinnaassusillit tamarmiusut 8,0 pct.-ii, 2006-imi 8,8 pct.-iusimalluni.
Suliffissaaleqinermit eqqorneqartut tassaapput inuit qanoq amerlatigisut qaammatip ataatsip ingerlanerani suliffissarsiortutut suliffissarsiuussisarfinnut saaffiginnissimasut. Kisitsisit agguaqatigiisillugu suliffissaaleqinermut ersersitsisuunngillat, tassa saaffiginnissimasut ilaat saaffiginninnermik kinguninngua suliffissamik innersuunneqarsimagamik imaluunniit saaffiginninnermik kingorna namminneerlutik suliffissarsisimagamik.