Illussanik titartaasartoq: Ilisarnaat nutaaq tivolimut assingusoq
Kommuneqarfik Sermersooq aamma Kalaallit Airports mittarfiup nutaap biilinullu inissiisarfiup akornanni pisuinnaat ikaartarfiliorniarnerat, tamatumalu saniatigut ilisarnaammik pilersitsinissamik anguniagaqarnerat, Nuummi illussanik titartaasartup Peter Barfoedip paasiuminaatsippaa.
Mittarfissami nutaami pisuinnarnut ikaartarfik Nuummi sila pissusia pissutigalugu atorsinnaanngilaq, Peter Barfoed, ukiuni arlalinni illoqarfiit pingaarnersaanni mittarfissap nutaap ineriartortinneqarneranut peqataalluarsimasoq, oqarpoq. Aamma isumaqarpoq pitsorluttut pingaaruteqannginnerusutut isigineqartut, tamannalu mittarfissamut nutaamut akuerineqarsinnaanngilaq.
Taanna oqarpoq silaannaap allanngoriartornera pissutigalugu sila sakkortunerulerlunilu siallernerusalerpat pisuinnaat ikaartarfiat atorsinnaanavianngitsoq, taamaattumillu timmisartoqarfiup biilinullu inissiisarfiup akornanni pisuinnaat ikaartarfiat aqqusernup Illerngit 2001-ip ataatungaani sananeqartariaqaraluartoq.
Elevatori aaqqiissutaasinnaasoq
- Pisuinnaat aqqutaat biilinut inissiisarfimmut aqqusinermullu atasariaqaraluarpoq, timmisartoqarfiullu iluani biilinillu inissiisarfimmi elevatoriliortoqartariaqaraluarluni, Peter Barfoed siunnersuuteqarpoq.
Taanna oqarpoq silarsuarmi sumi tamaani qimuttuitsut unittarfiini, Norgemi Sverigemilu biilit unittarfiini aamma assersuutigalugu Københavnimi metrot S-tog-illu unittarfiini elevatoreqartoq.
Pisuinnaat aqqutaannik qaqqap iluani biilinut inissiisarfiliortoqarsinnaanersoq aamma misissorneqartariaqaraluarpoq, nateq silami aqqusinermut naligitillugu, illussanik titartaasartoq oqarpoq, nalunngilaali qaartiterisoqarsinnaanersoq qulakkeerniarlugu qaqqap pitsaassusaa misissorneqaqqaartariaqartoq.
Ilisarnaat
Pisuinnaat ikaartarfiat mittarfimmut ilisarnaataalernissaa isornartorsiungaatsiarpaa.
- Mittarfik ilisarnaaterpassuaqareerpoq, pisuinnarnullu ikaartarfik mittarfiup illutaata isikkuanut unammillertussaassaaq, Peter Barfoed isumaqarpoq.
KAIR-ip kommunillu tapersersuineratut pisuinnarnut ikaartarfiliortoqassappat, illussanik titartaasartoq naapertorlugu sinaa qalialu igalaanik mattusuunik igalaalerneqassaaq, illullu iluanut elevatorimut atassuserneqassaaq, taamaalilluni angalasunut oqimaatsunik nassatalinnut qatsissutsit nikingassutaat ingalassimaartinneqassaaq.
Peter Barfoed naapertorlugu biilinut inissiisarfiup inissisimaffissaa ukiukkut aperujussuartarneratigut unammillerneqartassaaq.
- Tivolimut assinguallaarpoq. Nunap ataatigut aqqusinermi angallattoqarluni, illussanik titartaasartoq, tamanna kommunip akisussaaffigisariaqarneranik paasiuminaatsitsisoq, pikkunarsaarluni oqarpoq.
Akisussaaffik
- Mittarfimmik piginnittoq suliassamik tamatuminnga suliassinneqarsimasariaqaraluarpoq, kisianni suliniummi missingersuusiornermilu kukkusoqarsimagunarpoq. Taamaattumik tamanna kukkunerujussuuvoq. Sooq kommunip maanna kommunimut pilersaarummut tapiliussaq aatsaat nassiuppaa, kommunimut pilersaarummut tapiliussaq ukiut tallimat arfinillit matuma siorna nassiunneqarnera ilanngunnagu, Peter Barfoed aperivoq. Mittarfiup inissakinnera pissutigalugu kukkusumik inissisimasoq taanna tunngaviusumik isumaqarpoq, timmisartuniillu mittarfiup illuutaanut ikaartarfissap amigaataaneranit tamanna aamma erserpoq, ilaasullu quasarluinnartumik aniffissaqaratarsinnaapput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...