Tele-Post
Imaatigut kabeli tallineqangajalersoq
Illoqarfiit pingasut imaatigut kabelikkut atassuteqalingajalerput
Tele-Postimi sulisut qaammammi uani Frankrigimiipput imaatigut kabelip Kalaallit Nunaannut ingerlanneqangajalersup sananeqarnera takusarlugu.
Kabeli katillugit 700 km-it missaannik takissuseqarpoq, kabelillu assigiinngitsut Nuup Aasiaallu akornanni immap naqqinut assigiinngitsunut naleqqussakkat tassani pineqarput.
Pilersaarutit naapertorlugit umiarsuaq imaatigut kabelimik siaarsisussaq juulip naanerani Nuummut tikissaaq, qaammallu aggusti Maniitsumut, Sisimiunut aammalu Aasiannut siaarsitsiffigissavaat.
- Ajunngitsumik isikkoqarpoq, umiarsuullu imaatigut kabelimik siaarsisussap Nuummut tikinnissaa, tamatumalu kingorna illoqarfinnut imaatigut kabelilersuiffiusussanut anngunnissaa qilanaaraarput, Flemming Drechsel Tele-Postimi nioqqutinut ataatsimoortunut pisortaq aammalu imaatigut kabelimik suliaqarnermut akisussaanerusoq tusagassiuutinut nalunaarummi oqarpoq.
Tele-Postip imaatigut kabeli aggustip 31-anni Aasiannut anngunnissaa naatsorsuutigaa.
- Tamatuma kingorna, tassa septemberimi oktoberimilu suliat allat naammassisarneqassapput. Oktoberimi novemberimilu atortoq tamarmi misilittarneqassaaq, suliarlu taamaalilluni naammassineqarsimassalluni, Tele-Post paasissutissiivoq.