Immiaaqqat kaajallaallu nunatta akiligaanik
Inatsisartunut siulittaasuusimasup Jonathan Motzfeldtip pisortat aningaasaataannik imminerminut annertuumik atuisarsimanera AG-p qulaajarpaa.
Angalanerit akisuut, imigassamik aalakoornartulimmik iggiserluni nerinerit akisuut, ilaquttanut ikinngutinullu tunissutit, ilaquttanullu angalanermut billetit Jonathan Motzfeldtimut inatsisartunut siulittaasuugallarami ulluinnarsiutaasimapput. Akiligasartaat nunatta karsianut ingerlateqqinneqartarsimapput, AG allappoq.
Aviisi politikerip angalanerpasuinit, nerinerpassuinit imminullu pisiniartarsimaneranit takussutissatut uppernarsaatinik hundredet arlalinnik pigisaqarpoq - akailigassat nunatta karsianit akilerneqartarsimasut.
Nunatta karsiata ilaatigut akilersimavaa Jonathan Motzfeldtip nuliatalu Kristianap 2002-imi katinnerannut atatillugu aningaasartuutit. Aggutsip 19-iani ikinngutaat ilaqutaallu 45-t Hans Egedep Illuani unnussiuaarnissamut qaaqquneqarsimapput. Illu taanna pisortatigoortumik aaqqissuussinerinnarnut atorneqartaraluarpoq. Festi 10.000 kronet inulaarlugit akeqarsimavoq.
Jonathan Motzfeldt aamma ilaquttat ikinngutillu pineqartillugit tukkusaartarsimavoq.
2004-mi decembarimi ilaquttaminut juullimut savaarartugassarsisimavoq, akia 2.122 kroner. Nammineq kreditkortini atornagu Namminersornerusut kreditkortia atorsimavaa. Aappaaguani ikinngutaasa ilaat politikeri nuimasuusimasoq inuuissiorpoq. Ikinngummut tunissutaasimapput tuborgi karsi viinnillu poortukkat. Akii: 644 kroner.
Qaqortumi aappariit ukioq taanna aamma katiffissiorneranni (sølvbrullup) 409 kronenik nalilinnik tunissutisisimapput, tassaallutik viinnit puiaasat pitsaasut pingasut. Qaqortumi ilaqutaat ilaat aamma 962 kronenik nalilinnik tunissutisivoq, tassa rødviinnit puiaasat pingasut, Ålborgsnaps puiaasaq ataaseq hofillu karsi ataaseq.
Jonathan Motzfeldtip takussutissat "kukkulluni atuinertut" taavai.
- Kukkusoqarsimappat taava ... taava aaqqittariaqarput. Tassami ilaannikkut kukkusumik atuisoqartarpoq, kisiannimi tassa ullut tamaasa taamatut takussutissartalinnik aaqqissuussineq ajorpunga. Tamakku allatima suliassaraat. Taavalu puigugaqarsimaguma ajuusaarpunga, taava iluarsissavagut. Tassa taamak sulisarpugut. arlaannik mianersuaalliorsimaguma ajuusaarpunga. Ajortoqarpat taava oqaluuserisarpagut. Aamma taamak sulisarpugut, Jonathan Motzfeldt AG-mut oqarpoq.