Imminut toqunnissamik eqqarsartunut oqarasuaammik ammajuaannartumik Suleqatigiissitsisut piumasaqarput
Namminersorlutik Oqartussat aamma kommuni ataatsimoorlutik Tasiilami imminut toquttarneq pillugu toraagaqarlutik suliniuteqarnissaannik Tillie Martinussenip kaammattuutigaa
Tasiilami eqqaanilu nunaqarfinni imminut toquttartut suli amerlapput. Oqaluttuareriikkatsitut ukiormanna septembarip aallaqqaataata tungaanut, imminut toquttut arfineq-pingasut politiit nalunaarsorsimavaat, ukiup siulia tamakkerlugu quliusimallutik. Kisitsisit taakku qaavisigut imminut toqoriartarnermut kisitsiseqarpoq.
Ukiap ingerlanerani ajorseriartoqarsinnaanera, Tillie Martinussenip ernumassutigaa. Tamanna §37 naapertorlugu apeqquteqaatigisaani atuarneqarsinnaavoq.
- Tamatta nalunngilarput upernaakkut ukiakkullu imminut toquttartut amerlanerusartut akiorniarlugit arlaatigut iliuuseqanngikkutta. Taamaasilluta paasivarput ilaatigut Tasiilami alianaqisumik imminut toquttoqarsimasoq aamma imminut toqoriartoqarsimasoq, tunngaviusumik pissutaalluni ikioqqugaluarneq, ilioriusissaaleqineq, tarnikkut nukissaalatsineq imaluunniit tarnikkut nappaateqarneq, apeqquteqaateqarneranut tunngavilersuummi tamanna oqaatigineqarpoq, taanna pisoq pillugu apeqquterpassuarnik imaqarpoq.
- Tasiilami meeqqat inuusuttullu atugaat pillugit ukiorpassuarni oqaluusereerpugut. Toraagalimmik suliaqartoqarnissaanik suli amigaateqarpunga, tamanna Namminersorlutik Oqartussat aamma Kommuneqarfik Sermersuup ataatsimoorfigisariaqarpaat, Tillie Martinussen, Sermitsiaq.AG-mut taama oqarpoq.
- Taamaattumik kissaatiginarpoq tusassallugu Naalakkersuisut kommunilu qanoq suleqatigiinnersut aamma Naalakkersuisut massakkorluinnaq qanoq iliuuseqarnersoq Tasiilami pissutsit paaseqqissaarniarlugit, taanna tunngavilersuuteqarnermini allappoq.
- Peqataanik isumaqarpugut pilersaarusiorluakkamik suliniuteqarneq Tasiilamilu inunnik isumaginninnikkut sullissinermi misilittagaalersut nunap sinnerani atorneqarluarsinnaajumaartut.
Alloriarnermik aalajangersimasumik imminut toqunnissamik eqqarsaateqartunut oqarasuaammik ulloq unnuarlu attavigineqarsinnaasumik pilersitsinissap piviusunngortinneqarnissaa piumasaraa.
- Inuit imminut toqunnissamik eqqarsaateqartut ulloq unnuarlu akunnerni 24-ni attaveqarfissaqarsinnaanerart pingaaruteqarpoq. Tamanna sivisuumik oqaluuserineqarnikuuvoq, taamaammat sumut killinnersoq tusarusuppara, taanna Sermitsiaq.AG-mut oqarpoq.