Inatsisartut
Inatsisartut ataatsimiittarfiissaannut D naaggaariiginnarpoq
Siunnersuummut akerleriiffiusumut politikerit suliaqaqqissapput
Nagga, Naagga aamma Naagga!
Nunarput Inatsisartut illussaannut nutaamut akissaqanngilaq, taanna akileraartartunut minnerpaamik 300 millionit koruuninik akeqartussaavoq.
Partiimit naalakkersuisoqataasunit oqariartuut taama nipeqarpoq, taakku aningaasat millionerpassuit meeqqat atuarfini atuartunut atukkanut pitsaanerusunut atorusunneruaat.
Atuaruk: Inatsisartut ataatsimiittarfissaannik takorluugaq uummarsaqqikkaat
Oqaluuserineqaqqissasoq
Inatsisartut nutaamik ataatsimiittarfittaarnissaannut siunnersuut akerleriissutigineqartoq ukiaanerani ataatsimiinnermi oqaluusereqqinneqarnissaa paasinarsimmat, Demokraatit siunnersuummut itigartitsipput.
Suliaq Suleriaaseq Pillugu Ataatsimiitsitaliamit qaqinneqarpoq, pilersaarullu malillugu oktoberip 21-ani oqaluuserineqassaaq.
Naaggartuarsimasut
- Siunnersuut saqqummiunneqaqqaarmalli oqarpugut naamik, inuiaqatigiinnilu ammasumik eqqartorneqaraangat oqartuarpugut naamik. Soorunalimi aamma Inatsisartunut aaliangiiffigisassatut saqqummiunneqarpat aamma oqarniarpugut naamik, Demokraatit Inatsisartunut ilaasortaatitaat naqissusiipput.
Politikerit aamma neriuutigaat, siunnersuutit tunuartinneqassasut - ataatsimiinnermilu eqqartorneqassanngitsut.
Ilaasortat aamma naqissuserpaat, Demokraatinit Inatsisartut Siulitaasoqarfianni aammalu Suleriaaseq Pillugu Ataasimiitsitaliami ilaasortaatitaq, Justus Hansen, siunnersuummut saqqummiusseqataasutut inissinneqarsimanera kukkunerusoq.