assit takukkit
Inatsisartut nutaamik apeqquteqartarfittaarput
Naalakkersuisut siulittaasuat illuatungiliuttunit apeqqarissaarfigineqartalerpoq Inatsisartut katersornerini pingasunngornerit allattortarlugit
Naalakkersuisut siulittaasuata apeqqarissaarfigineqartalernera Inatsisartut siulittaasuata Lars-Emil Johansenip Siumumeersup iluatsilluartutut nalilerpaa. Illuatungiliuttut Inuit Ataqatigiit nalilersuereerunik suleriaaseq nutaaq nalilerniarpaat.
Naalakkersuisut siulittaasuat Aleqa Hammond Siumumeersoq siullerpaamik pingasunngornermi suleriaaseq nutaaq atorlugu apeqqarissaarfigineqarpoq. Suleriaaseq taanna malillugu illuatungiliuttut kisimik apeqquteqarsinnaatitaapput naalakkersuisooqataasut ilaasortaatitaat apeqquteqarsinnaatitaanngitsut.
Nersualaarinngikkallarpoq
Illuatungiliuttut siulittaasui kisimik apeqquteqaateqarsinnaatitaanermi nutaami apeqquteqarsinnaatitaapput. Oqaaseqartartut aamma apeqquteqarsinnaatitaapput partiip siulittaasua Inatsisartuni ilaasortaatitaanngippat.
- Periuseq nutaaq atuutiliinnarluni iluatsilluarpoq. Taamatut iliuuseqarneq Inatsisartuni Inatsisartullu oqalliseriaasiannik ingerlaavartumik inerisaanerup nutarterinerullu ilaatut isigaara. Neriuppunga ukiuni aggersuni iliuutsinik taamaattunik Siulittaasoqarfik saqqummiussisinnaajumaartoq, Inatsisartut siulittaasuat Lars-Emil Johansen nalunaarpoq.
Illuatungiliuttulli Inuit Ataqatigiit aaqqissuussinermik nutaamik nersualaarinissamut tunuarsimaarallarput.
- Aaqqissuussineq nutaaq ulluni tulliuttuni nalilersortussaavarput tamannalu pereerpat qanoq isumaqarfiginerlugu aalajangerumaarparput. Taamaammat maannakkut oqaaseqarfigisinnaanngikkallarpara, Inuit Ataqatigiinni siulittaasuugallartoq Aqqaluaq B. Egede Sermitsiaq.AG-mut oqarpoq.
Naalakkersuisooqataasut siulittaasui apeqquteqarsinnaatitaannngillat taakku periarfissaqareermata ajornannginnerusumik Naalakkersuisuniit paasissutissanik pissarsinissamut.
Assit ataani takukkit