Ineqartut angerlarsimanerisa nalaanni tillinniat

Unnuaq pingasut eqqaanni Nuummi Gertrud Raskip aqqutaanit ineqartut ilaat sianerpoq, illumini inunnit marlunnit isertoqarsimalluni itertinneqarsimalluni.

- Angutit marluk inuusuttut illumit qimaapput kisianni aappaa sivitsorianngitsoq politiinit tigusarineqarpoq. Paasinarsivoq nukappiaasoq 16-inik ukiulik, ukioqatini peqatigalugu unnuap ingerlanerani tillinniaqattaarujoortut, politikommissær Niels Nyvang Nuummi Politiinit oqaluttuarpoq, nangilluni nukappissap aappaa killisiorneqartoq iperagaaqqittorlu, aamma politiit nalunngilaat tillinniaqataasut aappaata kinaassusia.