Inissaqartuaannarpoq
Inatsisartut Nuummi kommunalbestyrelsip ataatsimiittarfiani ataatsimiipput
Inatsisartut siulittaasuat Josef Motzfeldt, Inuit Ataqatigiit, angerlarsimasutut misigaaq tallimanngornermi nalunaaqutaq 10.00 Nuummi kommunalbestyrelsip ataatsimiittarfiani borgmesterip issiavianut ingilluartiterami. 1980-ikkut naalerneranni Nuup Kommuniani kommunalbestyrelsimut ilaasortaavoq, inatsisartullu ataatsimiittarfiani oquk pissutigalugu nammineq aamma inatsisartunut ilaasortat tamarmik apernarnerani ataatsimiinnerminni ullut ataatsimiiffissat kingulliit marluk kommunalbestyrelsip ataatsimiittarfiani ingerlappaat.
Borgmester Asii Chemnitz Narup inatsisartuni ilaasortanik naalakkersuisunillu kommuneqarfiup allaffianut tikilluaqqusivoq neriulluni taamatut upernarnerani ataatsimiinnerminni inatsisartut eqqissillutik ullut kingulliit marluk ataatsimiikkumaartut.
- Inatsisartut taamatut oquup kingunerisaanik pisumi erloqinartumi tapersersussallugit nuannaarutigaarput, inatsisiliorluni sulineq taamatut unittuunnginniassammat.
- Qujanaqaaq suleqatigiissinnaagatta politikkikkut aamma aaqqiisarnissamut tamakkununnga tunngasutigut, Asii Chemnitz Narup oqarpoq.
Inissat nutaat
Kommunalbestyrelsip ataatsimiittarfia inatsisartut ataatsimiittarfiannit mikineruvoq, kisianni inissaqartuaannarpoq. Issiaviit nuussornerisigut inatsisartuni ilaasortanut, naalakkersuisunut aamma atorfilittaannut inissaqalerpoq - rigsombudilu nutaaq Mikaela Engell, rigsombuditut siullerpaamik inatsisartut ataatsimiinneranni peqataanngaartoq. Inissakinnerulertoqaraluartoq taamaattoq kommunalbestyrelsip ataatsimiittarfia Hans Lyngep qalipagaanik ikaartitikkanik pinnersagaasoq Kalaallit Nunaanni ataatsimiittarfiit kusanarnerpaartarigunarpaat.
Inatsisartuni ilaasortat ataatsimiittarfimmi tulleriiaarlutik issiasartut kommunalbestyrelsip ataatsimiittarfiani nerrivinni ulamertumik inissitsiterneqarsimasuni issiapput. Josef Motzfeldtip makitsinikkut ilaasortat tamaasa issiavissarsisimavai, taamaattumik politikkikkut imminnut tapersersoqatigiinngitsut sanileriillutik issiaqatigiipput, parteeqatigisallu ataatsimiittarfimmi tamarmi siaruartitersimallutik. Taamatut issianertik quiageqaat, immaqalu inatsisartut siulittaasuata makitsinissaq eqqarsaatigeqqittariaqassavaa ataatsimiittarfimmi nipi nuannerunnaaraangat...
Josef Motzfeldt avatangiisit nutaat pillugit naammagittaqqusivoq, taamatut aaqqiisoqarmat annertuumik oquttoqarmat Namminersorlutik Oqartussani, politiini aamma rigsombudeqarfimmi. Nerisassat tigusariaannaat mamarunarpasivissut, kommuneqarfimmi igasumit John Olsenimit piareersarneqarsimasut, isumaginnerulersitsiinnarput, kisianni kommunalbestyrelsip ataatsimiittarfiani politikkikkut oqallinnerit inatsisartut ataatsimiittarfianisulli aaqqiagiinngittuarsinnarput aalisarneq oqaluuserineqalermat.
Upernarnerani ataatsimiinneq naammassissaaq pingasunngornermi apriilip 13-iani kommunalbestyrelsip ataatsimiittarfiani.