Inissiaatileqatigiiffik sinneqartooruteqarluartot - siulersuisunilu nutaamik ilaasortaqalerluni
Illuut 2021-mi 28,5 millioner koruuninik sinneqartooruteqarsimavoq. Jørgen Aqe Møller siulersuisuni ilaasortanngorpoq.
Namminersorlutik Oqartussat inissiaatileqatigiiffiutaat Illuut A/S 2021-mi naatsorsuutigisimasamit sinneqartooruteqarnerungaatsiarsimavoq. Illuut Namminersorlutik Oqartussat inissiaataannik nutaajusunik piginnittuullunilu ingerlatsisuuvoq.
Ukiumi angusat 28,5 millioner koruuniupput, tamatumunngalu arlalinnik pissuteqartoq, ingerlatseqatigiiffimmi pisortaaneq Torben Pauls marlunngornermi ataatsimeersuartoqarmat nassuiaavoq.
Pisortaaneruo oqaatigaa, ingerlatseqatigiiffimmit assersutigalugu aserfallatsaaliinissamut nutarterinissamullu missingersuutinit 3,4 milliarder koruuniusunit taamaallaat 2,3 millioner koruunit atorneqarsimasut.
Marraasersuinissamik suliniummut neqerooruteqartoqarsimanngitsoq
- Marraasersuinissamik suliniummut annertuumut, ukiumi suliniummut annersaasumut neqeroortitsinitsinni akigititassanik pissarsisimanngilagut, pisortaaneq ataatsimeersuartoqarmat oqarpoq.
Pisortaanerup oqaatigaa, suliniutip ilaannakortumik aallartinneqarsimanera iluatsinneqarsimasoq. Illuut tamatuma saniatigut annertuumik taarsigassarsinissamut ukiup ingerlanerani akuerineqarsimavoq, tamannalu angusaqarluarsimanermut sunniuteqarsimasoq. Illuut aamma inissianik arlaqartunik tunisaqarsimavoq, angusarissaarnermut aamma sunniuteqartumik.
Kaaviiaartitat 71 millioner koruuniusimapput, namminerlu aningaasaatigisat maanna 231 millioner koruuninngorsimallutik.
Finn Olesen siulersuisuni ilaasortaajunnaartoq
Ataatsimeersuartoqarnerani ilisimatitsissutigineqarpoq, Finn Olesen siulersuisuniit tunuartoq, Naalakkersuisullu Finn Olesenip taartissaatutut Jørgen Aqe Møller toqqarsimagaat.
Jørgen Aqe Møller Royal Arctic Linemi aningaasaqarnermut pisortatut nutaatut qanittukkut saqqummiunneqarpoq. Taanna Royal Arctic Linemi 2017-imili sulisuusimavoq.
Siulersuisuni siulittaasoq Steffen Ulrich-Lynge siulersuisuini siulittaasutut toqqagaaqqippoq.
- Illuutip ineriartortinneqarnerata takutippaa, pisortat inissiaataannki periarfissaqarluartoq - aamma Namminersorlutik Oqartussat piffissamut ungasinnerusumut aningaasaliissuteqarsimaneranni, siulersuisuni siulittaasoq ataatsimeersuartoqarmat oqarpoq.