Qaqortoq
Inissiap ikuallassimasup isaterneqarnera siusinnerusukkut pisinnaavoq
Qaqortumi inissiaq blokki juulli sioqqutilaarlugu ikuallattoq, siusinnerusukkut isaterneqarsinnaassaaq
Ineqarnermut Naalakkersuisoqarfik Qaqortumi Blok J-ip juullinngitsiartoq ikuallanneranut atatillugu misissuinermik ingerlataqarpoq.
- Naalakkersuisoqarfiup ajoqusernerit sunniutigisassai INI suleqatigalugu nalilersuleruttormagit, kiisalu isaterinerup sapinngisamik sukkanerpaamik ingerlanneqarnissaa qulakkeerniarlugu suliniutit suut ingerlanneqassanersut paasinarsisissallugu, taamaalilluni inissiarsuaq isumannaallisaanermi aarlerinartorsiortitsisutut inissisimaannassanani, Namminersorlutik Oqartussat tusagassiuutinut nalunaarummi allapput.
Siornatigut ukiut tallimat qulillu qaangiutinnginnerini isaterisoqarnissaanik pilersaaruteqartoqarnikuuvoq.
Atuaruk: Ilaqutariit inissaaruttut ikiorneqarluartut
Inissiat taartissat
Blok J katillugit 32-inik inissiartaqarpoq, taakkunani juullinngitsiartoq ikuallattoqalermat taamaallaat 16-it najugaqarfigineqarlutik. Attartortut 7-it toqqaannartumik ikuallattoqarnerani sunnerneqarput, aammalu inissiani utaqqiisaasumik ingerlaannaq inissinneqartariaqarsimallutik, INI-p inoqutigiinnut kalluarneqartunut taakkununnga inissianik taartissanik isumannaarisinnaassasoq ilisimatitsissutigineqarpoq.
Tamatuma saniatigut ilisimatitsissutigineqarpoq, inissaaleqisoqarnera tunngavigalugu, Suliassaqarfimmut pilersaarutip nutarterneqarsinnaanissaa siunertaralugu, illoqarfimmi illuutit Namminersorlutik Oqartussat suliassaqarfimmut pilersaarutaani Qaqortumi isaterneqartussatut inassutigineqartut, misissorneqarmata. Taamaalilluni illuutit siunissami illuutinik atorneqarnerisa sivitsorneqarnissaanut taamaalillunilu iluarsaanneqarnissaannut Namminersorlutik Oqartussat pilersaarutaanni siunissami ilaatinneqarsinnaassallutik.
- Nutarterinermi tassani inissiat arlallit iluarsaanneqartariaqassapput (pingaartumik Illoqarfiup qeqqani), tassani suliassat taakkua suliarineqarnerat pillugu INI qanimut suleqatigineqassasoq naatsorsuutigineqarluni, iluarsaassinerit 2018-ip aallartinnerani aallartinneqarsinnaaleriissasut naatsorsuutigineqarluni, Namminersorlutik Oqartussat nalunaarput.
Blok J-ip ikuallanneranut atatillugu ajoqusertoqanngilaq.
Atuaruk: Qaqortumi inissiami ikuallanneq