Inissiat pillugit suliami paasissutissat nutaat: Attartornermi amigartoorutit miliuunilikkaajusut

Namminersorlutik Oqartussat paasissutissat amerlanerusut Kommuneqarfik Sermersuumi ineqarneq pillugu suliamut attuumassuteqartut pingasunngornermi saqqummiuppaat. Tamanna ilaatigut kommunimit politikkerimillu Asii Chemnitz Narupipmit, Nakkutilliisut suliamik aalajangiissuteqarnerminnut tunngavigisimasaannik paasisaqarnerusimasunit ujartorneqarsimavoq.

Paasissutissat pineqartut ilaatigut tassaapput, eqqartuussissuserisup allagai ilanngussaalu arlallit Kommunit Nakkutilliisoqarfiata aalajangiinermi tunngavigisimasai. Paasissutissat ilagaat, kommunip namminersortunut attartornissamik isumaqatigiissutaani arlalinni aningaasaqarneq pillugu kukkunersiuisup allagarisimasai.

Attartornissamik isumaqatigiissutit misissorneqarsimanerisa takutippaat, attartornerup nalaani attartorneqarsimasut tamarmik miliuunilikkaanik amigartooruteqarfiusimasut.

Kukkunersiuisup attartukkani sisamaasuni uku itisilerlugit misissorsimavai, imatullu inerniliilluni:

• Eqalugalinnguani inissiat 23-t. Attartornermut aningaasartuutit akinut naleqqussarneqarsimammata, 2017-2027-mi ingerlatsinermi amigartoorutaasussat tamarmiusut, ingerlatsinermi aningaasartuutit ilanngullugit 15,8 millioner koruunit missaanniittussatut naatsorneqarsimapput. Attartornermi isertitarineqartarput 505,88 kr/m2, namminersortunullu attartornermi aningaasartuutigineqarlutik 1065,18 kr/m2 (akinut naleqqussakkat).
• Inissiat 58-t - Kissarneqqortuunnguaq. Attartornermut aningaasartuutit akinut naleqqussarneqarsimammata, 2019-2027-mi ingerlatsinermi aningaasartuutit tapiissutitallit 29,2 millioner koruunit missaanniittussatut naatsorsorneqarsimapput. Attartornermi isertitarineqartarput 804,37 kr/m2, namminersortunullu attartornermi aningaasartuutigineqarlutik 1.724,67 kr/m2 (akinut naleqqussakkat).
• Sanaartukkami nutaami inissiat 18-it - Kujallerpaat - Attartornermut aningaasartuutit akinut naleqqussarneqarsimammata, 2017-2027-mi ingerlatsinermi aningaasartuutit tapiissutitallit 20,9 millioner koruunit missaanniittussatut naatsorsoneqarsimapput. Attartornermi isertitarineqartarput 501,11 kr/m2, namminersortunullu attartornermi aningaasartuutigineqarlutik 1540,76 kr/m2 (akinut naleqqussakkat).
• Inissiat qulit - Qunguleq - Attartornermut aningaasartuutit akinut naleqqussarneqarsimammata, 2017-2027-mi ingerlatsinermi amigartoorutaasussat tamarmiusut tapiissutitallit 12.4 millioner koruunit missaanniittussatut naatsorsorneqarsimapput. Attartornermi isertitarineqartarput 636,26 kr/m2, namminersortunullu attartornermi aningaasartuutigineqarlutik 1.629,27 kr/m2 (akinut naleqqussakkat).

Misissuisimanerup takutippaa, Kommuneqarfik Sermersuup attartonermut akiliutigisartagaasa pingasorarterutaasa aaamma affaatasa akornanniittoq matussusertittaraa.

- Pisiaqarneq imminut akilersinnaanerusoq

Kukkunersiuisutp attartukkani qulingiluaasuni kommunip isumaqatigiissuteqarfigisimasaanni aningaasartuutaasartut misissorsimavai, tassungalu atatillugu kommuni isumaqatigiissutinut ukiumut 12,75 millioner koruuninik amigartooruteqartartoq naatsorsorsimallugu. Tamatuma qaavatigut ingerlatsinermi aningaasartuutit kommunimit akilerneqartarput, aamma namminersortunut attartornermi aningaasartuutit akinut naleqqussagaammata, amigartoorutaasartut attartornerup 2027-mi atorunnaarnissaata tungaanut amigartoorutit alliartuinnassasut naatsorsorsimavaaR.

Kukkunersiuisup aamma inerniliussimavaa, kommuni inissianik pisiaqarnissamut aningaasaateqartuuguni, tamanna kommunimut akilersinnaanerussasoq:

- Maluginiarneqarpoq, inissianik pineqartunik pisiaqarnissamut akitiginneqartut 5.8%-iisa missaanniittut attartornermi akiliutigineqartartut. Kommuni akissaqartuuguni inissianik pisiaqarsinnaasimasuuppat (pisiaqarnissamut taarsigassarsisinnaalluni), maanna erniaritinneqartut eqqarsaatigalugit imminut akilersinnaanerusimassagaluarpoq, Kukkunersiuisarfimmi Beierholmimi kukkunersiuisartoq Jan Nygaard allappoq. Paasissutissat allat suliamut attuumassuteqartut Namminersorlutik Oqartussanit saqqummiunneqarsimasut uani atuarneqarsinnaapput.

Nakkutilliisut isornartorsiuisut

Nakkutilliisut ukioq manna novembarip qulingiluaani Kommuneqarfik Sermersuumut isornartorsiuipput, peqqussutigalugulu kommuni namminersortut inissiaataanni attartoriarluni amigartoorutaasumik innuttaasunut attartortitseqqiisarnerminik unitsitsissasoq.

Kommunip suliap ingerlatiinnarneqarnissaa attattuarsimavaa, isumaqartoqarmat aaqqissuussaq inatsisinik unioqqutitsinerunngittoq, aamma innuttaasorpassuit kommunip inissiaatileqatigiiffiutaa Iserit aqqutigalugu inissarsiniartarnerat pitsaasuusoq, kommunimumi inissianik sanaartoriarluni attartortitsisarneq aamma akisusarmat.

Borgmesteri Charlotte Ludvigsen (IA) Sermitsiaq.AG-mit apersorneqarluni oqarnikuuvoq, inissaaleqisoqarnerata ukiumi nutaami aaqqiissutissarsiorneqarnissaa pingaaruteqarnerpaajusoq.

Ineqarneq pillugu suliaq uani paasisaqarneruffigisinnaavat.