Innarluutilittut ulloq ataaseq
Qeqqata Kommuniani borgmesterip Hermann Berthelsenip Sisimiuni illuutit tikinneqarsinnaarannut tunngatillugu ataatsimeersuarneeqqami kaamisartakkanik issiavimmiittut tappitsuutullu inuuneq nammineerluni misilippaa.
- Pisuusaarnerummat qujanaqaaq, borgmesteri Hermann Berthelsen, Qeqqata Kommunia, oqarpoq, issiavimini kiviimilluni Søren Ginnerup , Statens Byggeforskningsinstitutimiit 'Tikinneqarsinnaanermut' tunngasut pillugit oqalugiartoq tusarnaaramiuk. Maannakkut 'peqqisseriasaarpoq'.
Taassuma siuninngua Hotel Sisimiuniit ataatsimeersuartarfimmiit, torsuusakkut isaarissamut, matukkut, tummeqqakku aqqalernermini peqqisseqqipallattariaqarsimavoq nammineerluni tummeqqakkut amerlaqisukkut issiavini kaamisartagaq aqquttariaqarsimagamiuk. Biilit inissinneqartarfiatigut aqqusinikkut peqataasut allat peqatigalugit ataatsimeersuarnissap tungaanut sukkalisaarpoq, tassanngalu akunnittarfiup ikuallattoornissamut matuatigoorluni, tassanilu peqqisseqqittariaqarluni, issiavik kaamisartagaq matserfikkut kivittariaqarlugu, ingeqqilluni elevatorip tungaanut kaamisarluni.
Ingerlaneq ilungersunarpoq. Kingorna aqqut taanna aamma uterlugu, maannakkulli tappiitsutut. Tassani inimit qaamaqisumit taartuinnarmut pigami ersiorsimavoq sattattariaqarlunilu.
- Innarluutit assigiinngitsut takorloorsinnaanissaat pingaartuuvoq, isigisinnaallunili pisussinnaallunilu pitsaaqaaq, misigisami kingorna oqarpoq.
Issiavimmi kaamisartakkamiitilluni Hermann Berthelsenip misillerfigaa, imminut tatiginissaq ajoriinnagassaanngitsoq, issiavik kaamisartagaq ingerlatinniassagaanni, tappiitsutullu allat nipaat tusaassallugit toqqissinartuusoq.
- Ullut ilaanni taamaalisinnaaneq eqqarsaatigissallugu qununaqaaq, misilittakkani tunngavigalugit oqarpoq.
Tappiitsutut issiavimmilu kaamisartakkamiinnermini Hermann Berthelsenip 'paarsisuni' Frederik Jensen Qeqqata kommuniani innarluuteqarnermut immikkoortumeersoq saniminiitippaa.
Sisimiuni Utoqqaat Angerlarsimaffiata ullormi tassani issiaviit kaamisartakkat aqqanilinniit ikinnerunngitsut tamanut atugassanngortippai.
Søren Ginnerupip Sisimiut illoqarfia innarluutilinnit pitsorluttunillu tikinneqarsinnaasuseq pillugu nersualaarpaa.
Illoqarfik Londonimisuut inngillaq taannami Europami qaffasinnerpaanut ilaavoq, kisianni Københavnimisuulli pitsaatigaaq, oqarpoq.