Innarluutillit nunatsinnut nuukkusunngillat
Isumaqatigiissuteqarnikkut angerlarnissaat qulakkeerneqassaaq, amerlasuulli ima sivisutigisumik Danmarkimiissimapput allaat qallunaatut misigisimalersimallutik.
Kalaallit innarluutillit 111-iusut Danmarkimi najugaqartut amerlanersaat Vestsjællands amtimi najugaqarput. Ukioq 2000-imi Namminersornerullutik Oqartussat amtilu kalaallit innarluutillit angerlartinneqarnissaat pillugu isumaqatigiissusiorput, P4 Sjælland paasissutissiivoq.
Tassa angerlartinneqarnissaminnik ukiup arfineq-marluk matuma siornali neriorsorneqarput. Sulili Danmarkimiipput. Kalaallit innarluutillit meeraanerminnili Danmarkimukartitaasut.
Nalornisoornartuuvoq, Slagelsep Kommuniani innarluutillit pillugit sullissinermi pisortaq Poul Bjergved oqarpoq.
Taakkua ilagaat 42-inik ukiulik Hansi Paukanak marlunnilli ukioqarluni Danmarkimi najugaqarsimasoq.
Hansip nunatsinnut uterluni najugaqarnissani takorlooruminaatsippaa, danskisummi misigisimalersimagami.
-Taamaammat taamaaliorusunngilanga, Hansi Paukanak oqarpoq.
Namminersornerullutik Oqartussat innarluutilinnut atugassanik 2007-imi 96 mio. koruuninik aningaasaliipput. Taakkua ilaat innarluutilinnut 111-iusunut Danmarkimilu najugaqartunut atorneqassapput. Ilaatigut ukiut tamaasa nunatsinnut tikeraartinneqartarnissaannut atorneqassapput.