iliuutsimut kingunerititaq
Inuiaqatigiinni sulisitaanermut eqqartuunneqartartut amerligaluttuinnartut
Eqqartuussiveqarfiit pinerluuteqartut inissiisarfianut taarsiullugu inuiaqatigiinni sulisitsinermik iliuusereriikkamut kingunerititaqartarneq atornerusalerpaat
2010-mili inuit pinerluttuliornerat ingasanngippat inunnullu ulorianartorsiortitsinngippat, pineqatissinneqarsimasut inissiisarfiannut taarsiullugu inuiaqatigiinni sulisinnissaannik eqqartuunneqarsinnaanerat periarfissaavoq.
Mianersortunnguamik taamatut aaqqiineq aallartissinnarluni maanna nuna tamakkerlugu siammarteriartorpoq, 2015-ip qaammataani qulini siullerni 29-t inuiaqatigiinni sulisitaasussanngorlugit eqqartuunneqartut, Kriminalforsorgen.dk ilisimatitsivoq.
Taarsiussaq
Inuiaqatigiinni sulisitaanerup siunertaraa, inuit pisortani imaluunniit nalinginnarmik iluaqutaasussamik akissarsiaqarani nammineersinnaajunnaartitaanermut taarsiullugu sulisitaanissaq.
Inuiaqatigiinni sulisitsisarneq Kalaallit Nunaanni pinerluttulerinermut inatsisip nutaap januarimi 2010-mi atuutilerneranut atatillgu eqqunneqarpoq, kisianni aatsaat 2014-mi taanna aaqqiissut atorneqarlualerpoq.
Eqqartuussut
Tamanna ilaatigut aaqqiissut nutaajummat tunuarsimaarnermik pissuteqarpoq, kisianni Nunatsinni eqqartuussivinni suliat naammassineqanngitsut amerliartuinnarnerannit pissuteqarneruvoq.
Suliat amerlanernut inuiaqatigiinni sulisitaanermik kinguneqartussaagaluit. Kisianni pineqartup utaqqinissaanut taarsiullugu, suliat taakku eqqartuussut pinerloqqinngikkaanni naammassineqartussaanngitsunngorneqartarput.
Sulisitat
2014-mi sulisitanik sulianik ikilisaalluni aallartittunik pilersitsisoqarpoq. Maanna ima naammassisaqartigaaq, eqqartuussiviit ullumikkut sulianik nutaaginnangajannik suliaqartarlutik. Tamanna inuiaqatigiinni sulisitsinernik amerlanerusunik eqqartuussisoqartarneranik kinguneqarpoq.
- Kalaallit Nunaanni taamatut aaqqiineq tigulluarneqarsimasoq isumaqarpunga, Nunatsinni Kriminalforsorgimi pisortaq, Hans Jørgen Engbo, Kriminalforsorgen.dk-mut oqarpoq.
Danmarkimit atugaanerusoq
- Inuiaqatigiinni sulisitassatut pineqaatissinneqartut amerlasussaat inuttussuseq naapertorlugu qimerlooraanni, Danmarki Kalaallit Nunaannit hunnorujoriaammik innuttunerusoq, amerlanerusunik inuiaqatigiinni sulisitsinissamut pineqaatissiisalissaagut, aqqusinikkut angallannermi pineqaatissiissutit 2.000-t missaaniittut ilanngunnagit. Tamannalu aaqqiissutip eqqunneqarneranit ukiut tallimaannaat qaangiuttut angussavaat, ilanngullugu oqarpoq.
Atuaruk: Aggustimi parnaarussivissamut qaartitseqqaartoqassaaq