Inuit tallimat kuliltemik ipisinneqangajapput
Aasianniit Nuummut angallammik angalanermi inuit tallimat kuliltemik toqunartorterneqaatigaat. Inuit taakku tallimat inuunerminnik maanna ajornartorsiorunnaarput, knr.gl allappoq.
Inuit tallimat ullumi ajunaangajalluinnarput, angallammik Aasianniit Nuuliartillutik kuliltemik najuussuisimallutik toqunartorterneqarsimagamik. Nuummi politiit ajutoorneq pillugu sapaammi ualikkut nal. 13.55 kalerrinneqarput.
Inuk alla umiatsiamit allameersoq sapiitsuliorluni pinasuartumik ikiuukkallartillugu inuit tallimat taakku annaanneqarput.
- Angut taanna angallammit annaassiniariartortumeersoq pinasuarluni umiatsiamut ajutoorfiusumut ikisimavoq, taamaalinerani inuit pingasut ajutoorfimmiittut ilisimajunnaareersimasut, taamak Nuummi politeeqarfimmi pisortaq John Thorsen knr.gl-imut oqarpoq.
Inuit tallimaasut taakku inuummarlioqisut inuinnarnit annaasiniartunit arlalinnit Nuummi umiarsualivimmut tidevandtrappemut apuunneqarput, tassani politiit ambulancellu ajutoortunut ikiuutissallutik utaqqillutik.
Inuit tallimaasut taakku tamarmik maanna navianartorsiorunnaarput.