Nuuk
Inuusuttunut sullissivik nukittorsarneqassaaq
Inuusuttunut sullissivik illumut allamut nuunneqassaaq saniatigullu sulisut ataatsimik ilaneqassapput
Inuusuttunut sullissivik illumut allamut nuunneqassaaq taamatullu nukittorsarneqassalluni. Tamanna aappaagumut missigersuutinit aningaasalerneqassasoq kommunalbestyrelsimit aalajangiunneqarpoq, kommuni ilisimatitsivoq.
Siunnersuineq
Inuusuttunut sullissivimmi siunnersuisartoqarpoq, taakku ilaatigut ilaquttanut, ilinniarnermut suliffeqarnermullu tunngatillugu ikorfartuinissaq suliassaraat.
Atuaruk: Sermersuup 2017-imi annertuumik sanaartornissaq siunniuppaa
Inuusuttunut sullissivik maanna inissiat ilaanni kiilerimi sullissiveqartoq killeqaqisumik sullissisarpoq. Tassa kiilerip inaasa mikivallaarneri pissutigaluguit inuussuttunik oqaloqateqartarneq killeqartarluni soorluttaaq aamma inuusuttunut arlalinnut suliniutinik assigiinngitsunik, soorlu aalajangersimasunik sammisaqartitsineq paasissitsiniaanerillu ajornakusoortarlutik.
Atuartut angerlasimaffigisimasaat
Inuusuttunut sullissivik Nuummi atuartut angerlarsimaffigisimasaannut aappaagu nuunneqassaaq.
Nuunneqarneranullu atatillugu inuusuttunut siunnersortit ataatsimik ilaneqassapput. Taakku ilaneqarnerani suliassat inuusuttunut attuumassuteqartut amerlineqassallutik. Aamma inuusuttut sullissivimmut oqaloqatiginninnissamik innersuunneqarneq ajortut amerlanerit aggersarneqartalissallutik.
Ilinniartut angerlarsimaffigisimasaata allanngortinneqarnissaanut atatillugu inuusuttut pinerluuteqarsimasutut pineqaatissinneqarsimasut inissiisarfissaannik ilaneqassaaq. Taamaalilluni Kommuneqarfik Sermersuumi inuusuttunut pinerluuteqarsimasunut ullumikkut inissiisarfeqanngitsoq peqalissalluni.