Inuusuk festival
Inuusuttut festivaalianni rapperluni unammersuarneq
Inuusuttut festivaalianni Inuusummi marlunngornermi unnukkut rappertoqarpoq, tusarnaariat 250-init sinneqartut silarluk soqutiginagu NUIF-imi najuuffigisaanni
Illu rappers, NUIF rappers soorunalimi aamma inuusuttut ataasiakkaat rappertartut sassarput. Immikkullu tupaallatsitsivoq nukappiaraq aqqaneq marluinnarnik ukiulik, Siivari Zeeb, taannami marloriarluni tiguartinnartumik rapperluni tusarnaartitsivoq. Unammiuaartitsineq unnuup ingerlanerani pikkunarsigaluttuinnartoq kikkut tamat rapperlutik unamminerannik naggaserneqarpoq.
- Tusarnaartut nuannarisatik illersortarpaat. Marlukkaarlutik rapperlutik unammisarput, isiginnaartullu illersukkamittut nipituuliorfiginerpaasaat ingerlaqqittarput. Naggataatigullu marluinnangorput, NUIF-ilu isiginnaartunik tiguartilluarsimasunik inoqarluarpoq. Inoqarujunneratalu kinguneranik ini kissakkaluaqisoq nuannisarfiuvoq, festivalimik aaqqissueqataasoq Angajo Lennert-Sandgreen, isiginnaariat silarluk soqutiginagu aggersimammata nuannaarutiginnittoq, oqarpoq.
Scene tamanut ammaqqissaaq
Pingasunngornermi unnukkut nalunaaqutaq 18:00 matut ammassapput, silalu suli ajornartorsiortitsisoq allannguutinik nassataqartitsisimavoq aamma. Kimiammi erinarsortua Miki Thomsen Ilulissani sapernguvoq, taamaammat Kimiakkunnut nalunaaqutaq 21.00 appittussaangaluanut taarsiullugu, NIUF-ip nipilersorfik kikkunnut tamanut qaqerusuttunut ammaqqippaa, Four Tupilaks aamma Qulleq kissassaareerpata.
Iserneq akeqanngilaq, kikkullu tamarmik tikilluaqqusaapput, aamma NIUF-ip Facebookimi qupperneratigut allannguutaasinnaasut allat malinnaavigineqarsinnaapput.
Nipilersortartut tallimat naggataartitsissapput
Aqagu sisamanngornermi Inuusuk 2015 naggataarnersiorlugu nipilersortartut tallimat appisimaassapput, tassaappullu Hans-Peter N. Bay, Nuutit, Qarsoq, Zikaza kiisalu Small Time Giants.
NIUF-imi taamaallat inuit 400-t isersimasinnaapput, taamaattumik aqagu sisamanngornermi matut nalunaaqutaq 18 ammarpata piareersimanissaq pisariaqarpoq.
Inuusuk NAPA-mit aningaasaleeqataaffigineqartoq, aamma Inuit Quality Clothing of Greenlandimit tapersersorneqarpoq.