KRK-Inua
Inuusuttut inuusuttoqatiminnik ilinniartitsisut
Kalaallit Røde Korsiata inuusuttunut suliniutigisaa Inua, Nuummi kajumissutsimikkut sullissierusuttunut siuttuusussanik sapaatip akunnerata naanerani pikkorissaatitsivoq
Inuami, Kalaallit Røde Korsiata suliniutigisaani, kajumissutsimikkut sullissisut sapaatip akunnerata naanerani sisamat nutaat naammassipput, Inuameersunit inuusuttunit allanit ilinniartinneqareerlutik.
Taama Kalaalit Røde Korsiat tusagassiuutinut nalunaaruteqarluni allappoq.
Nunatsinni nammineq kajumissusertik aallaavigalugu sullissisartut nutaat Røde Korsip nunarsuaq tamakkerlugu sulinermini tunngavii arfineq-marluusut sapaatip akunnerata naanerani sammivaat.
Soorlu aamma inuusuttut taakkua tarnikkut ikiueqqaarneq, inoqatinut atukkamikkut peruluttunut tapertaanissaminnut ikiuisinnaanissaminnullu sakkussaqalerlutik sammigaat. Kiisalu kajumilluni sulisutut inissisimanerup isumaanik, sutut atorneqarsinnaaneranik tikkuunneqarlutik.
Video takuuk: Inuusuttut inuusoqatiminnik ikiuisut -kajumissutsimikkut sulerusuttunik ilassarsiorput
Inuami peqataasut nammineerlutik inuusoqatiminnik sammisassaqartitsiniarnitik piareersaasiortarpaat Nuummi, Ilulissani, Aasianni Qeqertarsuatsiaanilu.
Kalaallit Røde Korsiata inuusuttunut suliniutigisaa Inua aallarnerneqarmalli 2013-miit kajumissutsimikkut sullisserusuttut 73-t ilinniartinneqarsimalerput.
Atuaruk: Inuusuttut inuusuttoqatitik ikiorpaat