Inuusuttut nunaqarfinniittut ilinnialernissaannut suliniutit iluaqutaasut
Nunaqarfinni piginnaasanik qaffassaasarnerit ukiut 13-it kingulliit ingerlanneqartartut iluatsilluarput. Naalakkersuisut nalunaarusiaminni taama naliliipput. Suliniutip ingerlanneqartarput nalimmassarnissaa nangeqqinnissaalu siunertaalereerpoq.
Inuusuttut nunaqarfinni illoqarfinnilu avinngarusimanerusuni najugaqartut piginnaasaannik qaffassaanermik suliniut iluatsilluarsimavoq. Suliniut NUIKI ukiuni 13-ini kingullerni 25-eriarlugu ingerlanneqarsimavoq, illoqarfinni nunaqarfinnilu katillugit 17-iusuni.
- Ulloq 1. august 2020-mi ilinniartunit 30-nit 27-t naammassisaqarput, 27-nillu taakkunanit 22-t ilinniagaqarnermik aallartitaqarsimallutik, sinnerilu suliffeqalersimallutik.
Ukiuni 13-ini kingullerni inuusuttut katillugit 375-it peqataasimapput.
Nalunaarusiami nassuiarneqarpoq suliniut annertusassallugu Naalakkersuisut pilersaaruteqalereersut.
- Siunissami qaninnerpaami NUIKI-mi suliniutit amerlanerit aallartisarnissaat Naalakkersuisut pilersaarutigaat, NUIKI 2.0-ikkullu Naalakkersuisut iliuuserisaq suli annertuseqqinniarpaat aamma najugaqarfikkaani inuiaqatigiinni kulturimik atajuartussamik pilersitsiniarluni suliat killingi qaangernerullugit, attuumassutilinnullu iliuuserisaqarnikkut suliniummi ilorraap tungaanut misilittakkat tunngavigalugit iliuuserisaq nutarsarniarlugu, Naalakkersuisut suliffeqarnermut nalunaarusiaanni 2021-mut tunngasumi allassimavoq.
Utoqqaat amerlanerusut inuusuttunit pilersorneqassasut
Suliffeqarnermut nalunaarusiami aammaarlugu erseqqissarneqarpoq utoqqaat inuiaqatigiinni amerlaneruleriartussasut, sulisinnaasullu utoqqarnik soraarninngoreersunik pilersuisussat suli ikiliartussasut.
Aningaaqarnermut Siunnersuisoqatigiit nalunaarusiaminni kingullermi nunaqarfinni illoqarfinnilu ilinniagaqassutsip nikinganerujussua aamma taavaa.
- Inuiaqatigiit agguataarnermikkut ineriartornerat eqqartorneqartoq, tassalu inuusuttut ikinnerusut utoqqalisunik suli amerliartuinnartunik pilersugaqartussaaffigisaat isumaliutigalugu inuusuttut ilinniakkamik naammassisaqarnissaannut atugassarisanik pitsaanerpaanik pilersitsinissaq pingaarluinnartuuvoq.
Nunaqarfinnilu inuusuttut sulilersinnissaannut siunertaqarneq pitsaasutut isikkoqarsinnaavoq. Nalunaarusiami kisitsisit saqqummiunneqartut naapertorlugit suliffissaaleqineq nunaqarfinnut naleqqiullugu illoqarfinni annikinneruvoq. Illoqarfinni piffissami 2016-2020-mi suliffissaaleqinermi 7,0 procentimiit 4,9 procentimut appariaateqarpoq, paarlattuanillu piffissami tassani nunaqarfinni appariarneq tassaasimavoq 9,6 procentiniit 8,5 procentinut.
Nalunaarsorsimanngitsut qulaajarneqassapput
Suliffeqarnermut nalunaarusiami ilanngullugu taaneqarpoq inuusuttut qassit, ilinniagaqaratillu, suliffeqaratillu suliffissarsiortutut allaqqanersut qulaajarneqassasut.
Suliffeqarnermut naalakkersuisoq, Jess Svane (S), erseqqissaavoq inuusuttut ilinniagaqarnissaannik kajumissaarinissaq annertusariaqartoq.
- Siunissami suliffeqarnermi piumasaqaataasut suli annertusiartuinnartumik immikkut ilisimasaqarnermik piumasaqarfiuleriartussapput, inuillu silatuut aamma assassullaqqissut atorfissaqartinneqarlutik pisariaqartinneqaleriartussapput. Taamaattumik inuiaqatigiittut innuttaasut tapersersortariaqarpagut, pingaartumik inuusuttut ilinniakkaminnik naammassinnittarnissaanni pitsaanerpaamik periarfissinnissaannik. Tamannami inunnut pineqartunuinnaq nuannaarutaassanngimmat, kisianni ataatsimut isigalugu inuiaqatigiinnut iluaqutaasussaammat, Jess Svane (S) oqarpoq.
NUIKI 2022-2023-imi Narsami, Kuummiuni Qaanaamilu ingerlanneqarpoq.