oqaaseqarsinnaaneq
Inuusuttut siulittaasuat uumissorneqartoq
Demokraatit Inuusuttaasa siulittaasuat Rasmus Dalsgaard Andersen ilaatigut pasillerneqarpoq kalaaliviunngitsoq
Kalaallit Nunaata namminersulivinnissaanik oqallinnermi isorinnittumik isumaqarneq akeqanngitsuunngilaq.
Tamanna Demokraatit Inuusuttaasa siulittaasuata, Rasmus Dalsgaard Andersenip, Sermitsiaq.AG-mi apersorneqareerluni, misigaa.
Isumaqatissarsiortut
Taassuma Partii Naleqqami, IA-mi Siumumilu inuusuttut politikerit kajumissaarpai namminersulivinnissamut pilersaarummik aningaasalerneqarsimasumik saqqummiusseqqullugit, oqarnertut ´sunniiniarlutik isumaqatissarsiuinnaratik´.
– Kalaallit innuttaasut iluamik sullikkusukkussigit siunnersuuteqartariaqarpusi pissutsinik maannakkut pitsaanerulersitsisunik. Akerlianik imaqanngitsumik oqaluppusi, pitsaanerpaamik taamaallaat paasisinnaasannik isumaqatissarsiorneq atorlugu qinersisussarsiorluni sunniiniarnertut, taanna ilaatigut oqarpoq.
Kinaassusersiortut
Sermitsiami allaaserisaq Demokraatit Inuusuttaasa Facebookimi qupperneranni qisuariarfigineqangaatsiarsimavoq. Tamakkuali amerlanerpaartaat piiarneqarsimapput. Tassa inuusuttut siulittaasuat naapertorlugu racemik nikassaarilluni kinaassusersiorluni ilanngussinerummata.
Kalaallisut oqalussinnaanngitsoq
– Arlallit naapertorlugit kalaallinut inuiaqatigiinnut ilaanngilanga, tamatumunngalugooq arlallit pissutaapput: Kalaallisut iluamik oqalussinnaanngirtsunga, taavalu taattukkut kalaalerpaluttuunngitsunga. Taamaattumillu kalaallit politikkianni akuleruttariaqanngitsunga. Aammattaarli tusaraangama allat aamma taamatut immikkoortinniarneqartartut; inuit kalaallisut oqaluttut ´qallunaarpasissulli´, inuillu kalaalerpasissut, kalaallisulli oqalussinnaanngitsut, taava isumaqarpunga inuiaqatigiinni ajornartorsiutilerujussuusugut, Rasmus Dalsgaard Andersen Facebookimi quppernermini allappoq.
Tamarmik inissaqarput
– Kikkunnut tamanut inissaqassaaq. Kinaluunniit kalaallini inuiaqatigiinni peqataarusuttoq ajattorneqassanngilaq. Kikkut tamarmik ajoqutissaqanngillat, qanorluunniit raceqarunik, oqaasiliugunik suiaagunilluunniit. Nunarsuarmi nunani siullersaasa race tunngavigalugu nikassaanerup akiorniarnerani ajugaasoq, nunatullu ataatsimoorta immitsinnut akerlilersortuaannarenata, inuusuttut siulittaasuat oqarpoq.